Халықтың тұрмыс-тіршілігінің деңгейін салынған құрылыс нысандарынан аңғару қиынға соқпайды. Бүгінде Қазалы ауданында бұл бағытта атқарылған шаруалар ауыз толтырып айтарлықтай. Аудан орталығы Әйтеке би кентінің ауқымы ұлғайып, көріктене түскен. Кең көшелер, сәулетті нысандар, әсем үйлер кенттің көрікті мекенге айналарын дәлелдеп тұрғандай.
Бұл аталған салаға мемлекет тарапынан жасалған жанашыр көзқарас, қазынадан бөлінген қомақты қаржы, аудан тізгінін ұстаған азаматтардың ұйымдастыру шараларының жемісі, құрылысшы қауымның төгілген терінің өтеуі екені анық.
Бір сәт нақты дерекке жүгінсек. 2018 жылы құрылыс жұмыстарының көлемі 11 млрд 516 млн теңгені құрап, көрсеткіш 153 процентке жеткен. Жұмысы жүргізілген 25 нысанның 19-ы пайдалануға беріліпті. Олардың қатарында, Әйтеке би кентіндегі 300 орындық мектеп, Жанқожа батыр ауылындағы спорт кешені бар. Оған қоса, «Қарлан» учаскесіндегі тұрғын үйлерге сервистік ауыз су желісі, кент-қала аралығындағы, 5 кварталда салынып жатқан көпқабатты тұрғын үйлердің инженерлік инфрақұрылымы жүргізілген. Сондай-ақ, құрылысы басталған мекемелер үйінің ғимараты, мәдениет үйі, 18 пәтерлі көпқабатты үйлер, Қазалы қаласындағы 180, кенттегі 210 гектар жер учаскелерін электрмен қамту, газбен жабдықтау, ауыз су апару жұмыстары жалғасын тапса, мемлекеттік-жекеменшік әріптестік негізінде Жанкент ауылынан дәрігерлік амбулатория ел игілігіне берілді.
Аурухананың ашылу салтанатына облыс әкімінің арнайы қатысқанын атап кеткен жөн. Шарада ҚР Парламенті Мәжілісінің депутаты Бақтықожа Ізмұхамбетов жаңа нысан жұмысына сәттілік тілесе, медицина саласының ардагері Орақ Кеубасовтың ел ағаларына көпшіліктің ризашылығын білдіріп, аудандық аурухананың бас дәрігеріне жедел-жәрдем көлігінің кілті табысталған болатын.
Жаңа жыл мерекесі қарсаңында Қазалы ауданында бірқатар сәулеттік нысандар бой көтеріп, іске қосылды. Аймақ басшысының ауданға кезекті іссапары кезінде Әйтеке би ескерткіші, Рәміздер алаңы ашылып, Ақтан батыр ауылындағы абаттандыру жұмыстары көпшілікке көрсетілді.
Аудан орталығын кеңейту мақсатында жасалып жатқан игілікті істерді күнделікті тіршілікте көріп жүрміз. Оларды жүзеге асыруға биыл бюджеттен 3,2 млрд теңге қаржы бөлінген. Осы аралықтан жаңа үлгідегі кәсіпкерлік нысандарын салу үшін жоспарланған жер учаскесі белгіленген. Қазалы қаласы Әйтеке би кенті аралығындағы автокөлік жолдары қайта жаңартылып, жоба-сметалық құжаты әзірленіп, мемлекеттік сараптамадан өткізілген.
Солардың арасындағы бірқатар нысандарға тоқтала кетсек. Әйтеке би кентінде құны 889,7 млн теңге болатын мекемелер үйі жобасы іске асырылуда. Аталған ғимаратты салудағы мақсат – тұрғындарға қолайлы орта қалыптастыру үшін аудан әкімдігі мен дербес бөлімдерді бір жерде шоғырландыру. Мұның өзіндік себебі де бар. Дербес бөлімдердің бірқатары кент әкімдігінде болса, кейбірі ескі аурухана ғимараты бөлмелерін жалға алып, пайдаланып отыр. Әйтеке би кентінің түбегейлі жоспарлау жобасына сәйкес мекемелер үйі ғимараты мектеп, аурухана, халыққа қызмет көрсету орталығы, сот, мәдениет үйі ғимараттарымен бір аумаққа орналастырылған. Бұлай жасау тұрғындар үшін аса ыңғайлы болмақшы. Қазіргі таңда аудан әкімдігі орналасқан ғимарат өткен ғасырдың алпысыншы жылдары бой көтерген. Қанша дегенмен уақыт ағымы өз ізін салған.
Сондай-ақ, аудан орталығында көпқабатты 6 тұрғын үй құрылысы жүргізілуде. Алдағы уақытта Әйтеке би кенті мен Қазалы қаласы аралығынан көпқабатты 12 тұрғын үй салу жоспарлануда.
Жұмабек ТАБЫНБАЕВ.
Қазалы ауданы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
