Кеше өткен Қазақстан халқы Ассамблеясының XXVI сессиясында Мемлекет басшысы – әлеуметтік бірлік тұғырнамасы ел іргесін нығайта түсетінін айтты. Жаңа бастамалар бәрінен бұрын осыған бағытталғанын жеткізді.
– Полиэтникалық мемлекет жағдайында әлеуметтік және ұлттық саясаттар тығыз байланысты. Сондықтан бес әлеуметтік бастама еліміздің барлық азаматтарына қатысты, осы орайда барша халқымызды дамытуға ықпал етеді,– деді Елбасы.
Халықтар бірлігі мерекесінің қарсаңында өткен келелі жиында елдің ертеңіне бағытталған жарқын жобалар жайы кеңірек сөз болды. Мемлекет басшысының таяуда Парламент Палаталарының бірлескен отырысында жариялаған бес әлеуметтік бастамасы төңірегінде ой-пікірлер ортаға салынды. Бұл әлеуметтік бастамада елімізде тұрғын үй сатып алудың қолжетімділігін қамтамасыз ету, салықтық жүктемені төмендету, микрокредитті кеңейту, елді газдандыру, сондай-ақ жоғары білімнің қолжетімділігі мен сапасын арттыру мәселесі алға қойылған болатын.
Әрине, бұл бүгінгі таңдағы өте өзекті мәселе. Мемлекеттің бұл қолдауы – әлеуметтік саланың жаңа сатыға көтерілуіне оң әсер ететіні сөзсіз. Ал маңызды әлеуметтік міндеттердің бірі – елдің басым бөлігін газбен қамтамасыз ету. Бұл бірінші кезекте халықтың өмір сүру сапасын арттыруға бағытталса, екіншіден өңірлердің экологиялық жағдайы да жақсара түседі.
Г.Щербакова,
«Славяне» қоғамдық
этно-мәдени бірлестігінің төрайымы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
