Сырдария ауданында жұмыс істеп тұрған кәсіпкерлік нысандарының саны өткен жылмен салыстырғанда 15 процентке артқан. Өңірдегі өрелі істер аудан халқының әл-ауқатын арттырып келеді. Қала іргесіндегі ауданда былтыр 5 млрд 658 млн теңгенің өнімі өндірілген. Мұнай өндіру көлемі төмендегенмен, агросекторды дамытуға мол мүмкіндік те, еңсерілген шаруа да жеткілікті. Бірнеше жыл қатарынан «Алтын дән» мерекесінде алдыңғы орыннан көрінді. Көш бастаған сәттері де аз емес.
«Еңбек» нәтижелі жұмыспен қамту және жаппай кәсіпкерлікті дамыту» бағдарламасының екінші бағыты бойынша былтыр «Аграрлық несие серіктестігі», «Ауыл шаруашылығын қаржылай қолдау қоры», «Өңірлік инвестициялық орталығы» мекемелері арқылы құны 462,1 млн теңге тұратын 156 жобаға несие берілді. Тың идеясын жолға қойып, кәсіп бастаймын дегендер де аз емес. Аталған бағдарлама аясында 200 тұрғын 86,8 млн теңге қайтарымсыз қаражат иеленді. Сондай-ақ, «Микробизнес – Қызылорда» бағдарламасы арқылы 38 жоба, «Бизнестің жол картасы-2020» бағдарламасымен 19 жоба қаржыландырылған. Жыл көлемінде аудандық кәсіпкерлер палатасы арқылы «Бизнес-кеңесші» курсын 218 адам тәмамдаса, «Бастау-бизнес» курсында 230 адам оқыған.
Көңілге жылу
сыйлады
Тереңөзек кентінде газдандыру қызу жүруде. 2019-2020 жылдарға 2,4 млрд теңге қаралған. Аудан орталығын 6 участокқа бөліп, мамандар құбыр жүргізуде. Бұл участоктардың жартысында жұмыс аяқталған. Қалғанын қыркүйекке дейін бітіру жоспарланыпты.
– Бүгінде 80 үй газға қосылуға дайын. Өткен жылы 9 мекеменің қазандығын сақадай сай еттік. Алдымызда 11 мекемені даярлау міндеті тұр. Бір ерекшелігі, біз газ құбырын жер астынан жүргізіп, әрбір тұрғын үйдің тұсына шкаф қойып кетеміз. Жер астынан жүргізу әрі қауіпсіз болмақ. Басқа да құбырлар жолын есептеп, барлығын пысықтап алдық, – дейді аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Ержан Бахтияров.
Адал еңбектің
наны
Ырысы тасыған берекелі ауылдың бірі – Ақжарма. Үш мыңға жетер-жетпес халқы бар елді мекеннің шаруасы шалқып тұр. Мұндағы қожалықтар халық қамын алдыңғы орынға қойған. Жас мамандарды баспанамен қамтамасыз етуді дәстүрге айналдырған ауылда жақында Шайымовтар отбасына жаңа үйдің кілті табысталды.
– Отағасы Тимур – шаруашылықта механизатор. «Елде болса ерінге тиеді» деп адал еңбектің нанын жеп жүрген жанбыз. Қос бүлдіршінді тәрбиелеп отырмыз. Жолдасым көпбалалы отбасынан шыққан. Ел ағаларының қолдауына алғысымыз шексіз, – дейді Айжан Сүлейменова.
Ажары айшықты ауылда кәсіпкерлік саласы да кең қанат жайған. Салық көлемі 5 млн теңгеге жетті. Ауыл тұрғындарының тың жобалары қолдау тауып, 23 грант жеңіп алса, 22 азамат жеңілдетілген несиеге қол жеткізген. Түнде шамдары жарқыраған мекенде жол жөндеу ісі де қарқын алыпты. Биыл 8 көше асфальтталып, жарықтандырылмақ. Бұрынғы қара жолдар жоқ десе де болады.
– Ауылдағы ең ірі қожалық – «Ақжарма и К». Онда 400-дей тұрғын жұмыспен қамтылған. Тәулігіне 60 тонна күріш ақтайтын зауыт жұмыс істеп тұр. Осы күнге дейін шаруашылықта жұмыс істейтін 8 отбасына үй берілсе, енді 5-інің құрылысы жүріп жатыр. Былтыр «Үлгілі ауыл» конкурсынан үшінші орын алдық. Елді дамыту мақсатында ауызбіршілікті алға қойып жұмыс істеп келеміз, – дейді ауыл әкімі Ерлан Ешмұратов.
«Айшаның» айы
оңынан туды
Тереңөзек кентінде «Айша» кондитерлік цехының ашылғанына көп болмады. Десе де, өз тұтынушыларын тауып үлгерген. Кәсіпкер Гүлжан Әбдіғаппарова тәтті тоқаш пісіруден бұрын кәсібін наубайханадан бастаған. Алғашқылардың бірі болып нан пісірген оны аудан жұртшылығы таниды.
– Сол наубайхананы үлкейтуді көптен бері ойлап жүргенмін. Алдыңа мақсат қойсаң, жетесің деген рас екен. Аудан орталығынан дүкен сатылады екен. Оның нарықтағы мүмкіндігін зерттедім. Содан соң сатып алып, ғимаратын бұзып қайта салдым. «Бизнестің жол картасы-2020» бағдарламасының бірінші бағыты бойынша «Халық банкінен» 14 млн теңге несие алдым. Мемлекет берген осынша мүмкіндік кәсібімді өркендетуіме даңғыл жол ашты. Бүгінде 800 бөлке нан, тоқаш, торт, т.б. өнімдерді бір күнде пісіреміз, – дейді кәсіпкер.
Ісіне шебер
Шағдат
Осыдан 7-8 жыл бұрын аудан орталығында автокөліктің қосалқы бөлшектерін сататын екі дүкен бар еді. Оның бірін Шағдат Қайранбаев ашқан. Одан бері де біраз уақыт өтті. Былтыр ол автокөлік жөндеу орталығын ашты. Бұл мақсатта «Бизнестің жол картасы – 2020» бағдарламасымен «Халық банкі» арқылы 9,3 млн теңге несие алды. Орталықта бес адам жұмыс істейді.
– Жөндеу орталығымен қоса көлік жуу орнын да аштым. Бір күнде 30-40 келуші бар. Қалаға сабылмай-ақ, автокөліктің ақауын осы жерден тауып, жөндей береді. Халыққа да қажеті сол. Тұрақты келушілерімізге жеңілдік те бар. Арнайы келісімшарт арқылы мекемелермен де жұмыс істейміз, – дейді кәсіпкер.
Д.Қырдан.
>>> Біздің Facebook, Instagram парақшаларымыз бен Telegram каналымызға жазылыңыз! <<<
