Отбасы институтын, өзара келісім мен рухани сыйластықты нығайту, бір шаңырақ астында берекелі өмір сүрудің маңыздылығын арттыру үшін елімізде «Мерейлі отбасы» ұлттық байқауы дәстүрлі түрде өткізіліп келеді. Шараның мақсаты – ата-аналық парыз, жауапкершілік секілді ұғымдарды жас ұрпақ санасына сіңіру, жарасымдылықты кеңінен насихаттау.
Биыл байқау жетінші рет ұйымдастырылды. Конкурс үш кезеңнен тұрады. Қалалық, облыстық және республикалық. Осы орайда «Мерейлі отбасы – 2021» ұлттық байқауының қалалық бірінші кезеңі мәресіне жетті. Пандемияға байланысты сайысқа қатысушылар құжаттарын алдын ала жіберіп, презентациясын ұсынды. Онда отбасы мүшелері, жеткен жетістіктері, қандай салада еңбек ететіні туралы ақпараттар берілді.
Байқауға өтінім 15 мамыр мен 15 маусым аралығында қабылданды. Биыл конкурсқа қала, кент және ауылдардан барлығы 14 отбасы қатысты. Жеңімпаздарды анықтау үшін қала әкімінің орынбасары А.Есжановтың төрағалығымен ұлттық конкурстың қалалық кезеңінің комиссия отырысы өтті. Сынға түскен қатысушылар арасынан жүйрікті анықтау оңай болмады. Қазылар алқасы байқауға қатысқан отбасы мүшелерінің жеткен жетістігіне, балалары мен немерелерінің өнеріне, ата-аналардың тағылымды тәрбиесіне мән беріп, бағалады. Ұлттық құндылықтарды, салт-дәстүр мен мәдениетті қаншалықты деңгейде білетініне де назар аударды.
Комиссия шешімімен 5 отбасы іріктелді. Оның ішінде Рсалиевтер мен Қожабековтер отбасы облыстық кезеңге жолдама алды. Жүлделі бірінші орынды иемденіп, облыстық кезеңге жолдама алған Рсалиевтер көпшілікке жақсы таныс. Отанасы Үмітхан Махамбаева – «Алтын алқа» иегері. 13 құрсақ көтеріп, «Батыр ана» атанған. Қазір оның 9-ы бір-бір шаңырақтың иесі. Отағасы Мақсұт Рсалиев өмір бойы шойынжолда еңбек етіп, саланың дамуына елеулі үлес қосқан жан еді.
Берекесі мен бірлігі жарасқан, татулығы мен ауызбіршілігі артқан шаңырақтың ұл-қыздары жоғары білімді, бір-бір саланың білікті маманы. Ұлдары кәсіпкерлік саласын жандандырып, отбасылық бизнесті дамытуда. Қыздары дәрігер, ұстаздық жолын таңдаған. Үмітхан анамыз әлі күнге дейін кілем тоқып, кесте тігеді. Бүгінде ақ жаулықты ана – 28 немере мен 15 шөберенің қызығына кенелген бақытты жан. Өнегелі отбасының жарасымды тіршілігі көпке үлгі тұтарлық.
Ал, екінші орынды иеленген Қожабековтер отбасы қалаға қарасты Қызылжарма ауылында тұрады. Отағасы Рүстембек Қожабеков – өнер адамы. Сырдария аудандық әуез мектебін, Жезқазған мәдени-ағарту училищесін бітірген. Алғашқы еңбек жолын Сырдария аудандық мәдениет бөлімінде жылжымалы клуб меңгерушісі болып бастаған. Бүгінде Қызылжарма ауылдық мәдениет үйінің директоры. Ал, отанасы Қуаныш Мырзабаева – ансамбльдің көркемдік жетекшісі. Олар 7 перзентті өмірге әкеліп, тәрбиелеп отыр. 2012 жылы Қожабековтер халықтық отбасылық ансамблін құрды. Құрамында 10 адам бар. Ансамбльдің бүгінде жеткен жетістігі аз емес. Дәстүрлі өнерді дәріптеп, ұлттық музыканы ұлықтап келеді.
Отбасы – қай заманда болсын, мықты мемлекеттің негізі. Еліміздегі үлгілілерді анықтау мақсатында ұйымдастырылған ұлттық байқаудың облыстық кезең жеңімпазы республикалық сайысқа жолдама алатын болады.
Сара АДАЙБАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
