Облыс әкімі Гүлшара Әбдіқалықова қуаңшылық кезеңінде малды шөппен қамтамасыз ету және егін жұмыстарын бақылау мақсатында Сырдария ауданы Шіркейлі ауылдық округіне қарасты «Мәді қажы» ЖШС-на барды.
Қожалықтың негізгі қызметі – күріш өсіру. Бұл жерде 250-ге жуық адам еңбек етуде. 2017 жылдан бастап тағы бір бағыт – құрылыс материалдарын өндіруді қолға алған. Онда қосымша 20 адам жұмыспен қамтылған.
Шаруашылық биыл 2840 гектар жерге дән сепкен. Оның 1900 гектары – күріш, 200 гектары – жаздық бидай. Топырақ құнарын арттыру мақсатында 540 гектар жерді ескі, 200 гектарды жаңа жоңышқа алып жатыр.
«Мәді қажы» шаруа қожалығының басшысы Сейіткамал Сұлтановтың айтуынша, Арал ауданына 5000 бау жоңышқа көмек ретінде жеткізілген.
Облыс әкімі қуаңшылықтан шығу үшін бірлесіп жұмыс атқару қажет екенін атап өтіп, бірқатар тапсырма берді.
– Аймақтағы шаруа қожалықтары шөпті басқа облыстарға сатпас бұрын осы екі ауданға қолжетімді бағада ұсынуы керек. Егіс алқабының атыз жағалауындағы шөптерді жинауға жастарды, еріктілерді жұмылдыру қажет. Бірлік көрсеткен жағдайда ғана бұл қиындықтан шығамыз, – деді Гүлшара Әбдіқалықова.
Айта кету керек, облыс әкімі аймақтарды аралау барысында, аудан әкімдеріне шөптен тапшылық көрген шаруаларға көмектесу үшін және егістікке су жеткізуде қосымша шаралар қабылдауды тапсырды. Шаруаларды шөппен қамтамасыз етуге ерікті жастар атсалысуда.
Шиелі ауданының Ақмая ауылдық округінде аяқсумен қамтамасыз ету үшін «Р-3-1» және «Р-3-2» каналына су айдайтын дизельді насос орнатылған. Сонымен қатар, «Ақмаяда» қысқы мал азығын дайындау қарқынды жүргізілуде. Қазірге дейін шаруашылықта 7480 бау шөп жиналған, 2500 бау шөп ауыл тұрғындарына таратылды және бұл жұмыстар жалғасатын болады.
Ал Жаңақорған ауданында тау беткейіндегі ауылдық округтердің шаруаларына «Түгіскен» тұқым шаруа қожалығынан шөп орып алуына мүмкіндік жасалған. Бастаманы алғаш болып Қыраш, Қосүйеңкі ауылдық округтерінің жастары қолдап, шөп басына жетті. Жастар үшін жататын орын, дала асханасы бар.
Қармақшы ауданында бірінші кезекте жергілікті тұрғындарды шөппен қамтамасыз ету шаралары жүргізілуде. Сондай-ақ, Арал ауданының ерікті жастарынан құралған бригадаларға «Жаңажол» ЖШС-ның аумағынан шөп орғызу мәселесі қолға алынып, ауыл жастары ұйымдасуда.
Бұл жұмыстар облыстың басқа аудандарында да үйлестіріліп жатыр. Шөп дайындауға «Жасыл ел» жастар еңбек жасақтары да атсалысатын болады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
