Қазақстанда этностардың құқығын шектейтін бірде-бір заң жоқ. Керісінше, барлық азаматтардың теңдігі Ата Заңда тайға таңба басқандай жазулы тұр. Әртүрлі ұлт өкілдерінің өз тілінде сөйлеуіне, құндылықтарын дәріптеуге, дәстүрлерін жаңғыртуға тыйым жоқ.
Жалпыхалықтық институтқа айналған ассамблея – құндылықтар мен азаматтық ұстанымдардың тұтастығын нығайтты және ортақ мақсаттар мен міндеттер аясында ел тұрғындарының мызғымас бірлігін қамтамасыз етіп келеді.
Қазақстан халқы Ассамблеясының XXIX сессиясында Елбасы Нұрсұлтан Назарбаев 30 жыл бұрын көпұлтты әрі көпконфессиялы Қазақстан халқы маңызды таңдау жасап, болашаққа бірлікпен, татулық және келісіммен бет бұрғанын айтқан болатын. Сессия бекіткен міндеттерді талқылау және жүзеге асыру үшін «Достық үйінде» облыс әкімі, облыстық Қазақстан халқы ассамблеясының төрағасы Гүлшара Әбдіқалықованың төрағалығымен «Бірлік пен бейбітшіліктің 30 жылы» тақырыбындағы облыстық Қазақстан халқы ассамблеясының ХХIII сессиясы өтті. Оған ассамблея мүшелері, облыстық мәслихат депутаттары Қызылорда қаласының әкімі Ғанибек Қазантаев, бейнебайланыс арқылы аудан әкімдері, этномәдени бірлестіктердің басшылары мен белсенділері, үкіметтік емес ұйымдар және БАҚ өкілдері қатысты.
Сессия модераторы, облыс әкімінің орынбасары, облыстық Қазақстан халқы ассамблеясы төрағасының орынбасары Серік Ахмет күн тәртібіндегі мәселелерге тоқталды. Мұнан кейін облыс әкімі алдағы міндеттер туралы баяндады.
– Биыл бірлігі бекем, татулығы жарасқан Қазақстан халқы тәуелсіздіктің 30 жылдығын атап өтуде. Тәуелсіздік – бұл, ең алдымен, біздің ортақ тарихымызға тағзым, кемел келешегімізге нық сенім. Елбасы Нұрсұлтан Әбішұлы Назарбаевтың сарабдал саясатының арқасында саяси жүйесі тұрақты, экономикалық әлеуеті мықты, халықаралық беделге ие қуатты мемлекетті қалыптастырдық.
Өткен жылы пандемия жағдайында халқымыз індетті еңсеру жолында бір жағадан бас, бір жеңнен қол шығарды. Облыстық ассамблея мүшелері осы істің бел ортасында болып, үлкен қолдау көрсетті. Осы орайда, Мемлекет басшысы Қасым-Жомарт Кемелұлы Тоқаевтың «Тәуелсіздік үшін нағыз күрес күнделікті еңбекпен, үздіксіз әрі дәйекті елдік саясатпен мәңгі жалғасады» деген сөзінің мазмұны терең. Іргелі мемлекет атануымызда, бірлік, келісім және өзара қолдау қағидаттарына негізделген Қазақстан халқы Ассамблеясының ролі ерекше. Бүгінде «Алаштың анасы» Сыр өңірінде 35 этнос өкілі тату-тәтті өмір сүруде. Осы ретте, қазақстандық патриотизм, азаматтық теңқұқықтық қағидаттарын, мемлекеттік тілдің біріктіруші ролін, алуан түрліліктегі бірлікті ілгерілету, ұлтты тұрақты жаңғырту жөнінде шаралар қабылдану қажет. Этномәдени бірлестік мүшелерін Саяси қуғын-сүргін құрбандарын толық ақтау жөніндегі өңірлік комиссияның жұмысына тартып, этноәлеуметтік процестерге мониторинг жүргізіп, қоғамдық келісімді бұзу ықтималдығы жоғары көріністерге талдау жасау арқылы оларды шешу бойынша ұсыныстар әзірленуі керек.
Қайырымдылықпен айналысып жүрген кәсіпкерлер мен меценаттарды ынталандырудың және қайырымдылықты дамытудың жаңа форматты шараларын ұйымдастыру маңызды, – деді аймақ басшысы.
Облыс әкімі «Жаңғыру жолы» жастар қозғалысының жұмысын жандандыру мақсатында аймақтық жастар ұйымдарымен бірлескен іс-шаралар кешенін жүзеге асырып, облыстық ассамблеяның Аналар және Қоғамдық келісім кеңестерін этносаралық байланыс алаңы ретінде пайдалануды тапсырды. Этносаралық қарым-қатынас, қайырымдылық, волонтерлік және мемлекеттік тілді үйрену орталықтары ретінде «Достық үйлерінің» жұмысын күшейту қажет екенін атап өтті.
Сессияда аймақ басшысы облыстық Қазақстан халқы ассамблеясының төрағасы ретінде Ирина Шекті төрағаның қоғамдық негіздегі орынбасары қызметіне тағайындап, алдағы жұмысына сәттілік тіледі. Сондай-ақ, осы қызметте болған Ильдар Гафуровқа алғысын білдірді.
Мұнан кейін облыстық мәслихат хатшысы Наурызбай Байқадамов сөз алып, тәуелсіздігіміздің үшінші онжылдығы жаңа міндеттер жүктейтінін атап өтті.
– Ұлттың жаңа болмысын, адами әлеуетін нығайту бағытында «Рухани жаңғыру» бағдарламасы аясындағы жұмыстарды жандандырып, қоғамдық сананы жаңғырту негізінде ұлттық бірегейліктің қайнар көзін ашуымыз керек. Бұл бағытта билік пен халықтың сындарлы диалогын қалыптастыру – біздің міндетіміз. Әйтпесе, ассамблея әлеуметтік желіні белсенді пайдаланатын сыншылардың тақырыбына айналып кетуі ықтимал. Сынағанның бәрі сыншыл, шымшығанның бәрі шыншыл емес. Біреу үшін қасиетті көрінетін нәрсе, екінші біреу үшін әзіл-оспақ немесе кекетудің тақырыбы болмауы тиіс. Бұл – ренішке бастайтын төте жол. Кез келген нәтижесі оң жобаларға сын ере жүреді. Сын қоғамның қозғаушы күші десек те, оның ықпалында кетуге болмайды, – деді мәслихат хатшысы.
Отырыста Ирина Шек тәуелсіздік жылдарында ассамблея жаңа белеске көтерілгенін атап өтті.
– Мен 20 жылдан бері ассамблея мүшесімін. Сонымен қатар «Возрождение» деп аталатын неміс этномәдени бірлестігінің жетекшісімін. Біз Отанымыздың өркендеп өсуіне өз үлесімізді қосып, еңбек етіп келеміз. Татулығы жарасқан Қазақстан мемлекетінің бақытты тұрғыны екенімді мақтанышпен айта аламын,– деді ол.
Ал облыстық перинаталдық орталықтың бас дәрігері Олег Ким денсаулық саласының дамуына қосқан үлесін азаматтық борышы санайды.
– Бүгінде ана мен бала өлімі азайды. Өткен жылы біздің ұжым орталықтың жұқпалы аурулар бөлімшесіне түскен 152 науқасты, оның ішінде COVID белгісі анықталған 72 әйелді емдеді. Жыл басынан 40 әйел дәл осындай белгімен біздің бөлімшеге түсті. Әріптестерім аянбай еңбек етті. Олардың арасында екі дәрігер «Халық алғысы» медалімен марапатталды. Медицина қызметкерлерінің еңбегі лайықты бағаланып келе жатқанына қуаныштымын,– деді бас дәрігер.
Сессияны қорытындылаған аймақ басшысы алдымызда кемел келешекке, жарқын болашаққа жету жолында атқарылуы тиіс маңызды істер барын атап өтті. Сонымен қатар, ел тұрақтылығын сақтауда, індеттің күшеюіне байланысты вакциналау жұмыстарын насихаттауға атсалысуда, қуаңшылық кезеңінде елді бірлікке шақыруда ассамблея ролі ерекше екенін назарға салды.
>>> Біздің Facebook, Instagram парақшаларымыз бен Telegram каналымызға жазылыңыз! <<<