Өңірдегі аптап ыстық бәрінің апшысын қуырып барады. Көлеңкенің өзі күйдіріп жіберердей. Синоптиктер шілденің басында да ыстықтың беті қайтпайтынын айтып отыр. Болжам еліміздің бірқатар өңіріне байланысты.
«Қазгидрометтің» 1-3 шілде аралығына арналған мәліметінше, термометр бағаны түнде солтүстікте, оңтүстік пен орталықта – 12-25, күндіз 30-44 градустан жоғары. Шығыста түнде – 12-20, күндіз 27-35 градус жылы. Ал батыста түнде – 15-26, күндіз 28-36 градус болады деп күтіледі. Бұған Иран аудандарынан ыстық және құрғақ ауа массаларының келуі себеп. Тек республиканың батысында, солтүстік батысында циклонның келуімен найзағай ойнап, жаңбыр жауады. Сондай-ақ бұршақ жауып, жел екпінінің күшеюі және ауа температурасының төмендеуі байқалуы мүмкін.
Төтенше жағдайлар министрлігі аптап ыстықтың әлі сақталатынын ескеріп, халықты аса қажеттілік болмаған жағдайда далаға шықпауға шақырды. Сондай-ақ төмендегіні қаперге алуды ұсынды:
– ағзаны сусызданудан қорғау үшін көп су, күніне кемінде 1,5-3 литр сұйықтық ішу;
– аптап ыстықта кез келген физикалық белсенділіктен бас тарту;
– күндіз күн сәулесі бөлмеге кірмеуі үшін терезелерді ашық реңкті перделермен жабу;
– күн өтпес үшін бас киім, ашық ауа өткізбейтін киім (мақтадан жасалған) кию керек.
Төтеншеліктер осындай күндері, әсіресе, балаларды ерекше бақылауға алуға кеңес беріп отыр.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<