Облыста қайырымдылық шараларын қолға алған қоғамдық ұйымдар жетерлік. Солардың бірі – «Ел-арай» қоғамдық қоры. Қор 2015 жылы жұмысын бастады, жетекшісі – Асхат Байдәулетов.
Еріктілердің ерлігі, еңбегі еленіп жүр. Республикалық және облыстық деңгейде марапатталуда. Елбасының «Рухани жаңғыру» бағдарламасы аясында ұйымдастырылған республикалық «Жомарт жүрек» байқауының облыстық кезеңінің жеңімпазы, «Жылдың үздік ұйымы» атанды.
Асхатты көпшілік жақсы таниды. Бала күнінен жаны жақсылыққа құмар азамат қайырымдылыққа ерте араласты. Ерікті болды, өзі секілді жалынды жастарды жанына жинап, көмекке мұқтаж жандардың қасынан табылды. Көптеген қайырымдылық жобасын жүзеге асырды. Әсіресе, әлеуметтік тұрғыдан аз қамтылған отбасыларын назардан тыс қалдырмай, қолдан келгенше көмегін көрсетуде. Жалғызілікті қарияларға қамқорлық танытты. Қордың қайырымдылық шаралары жылдан-жылға жалғасып, ауқымын кеңейтуде. Түрлі жоба бойынша жұмыс жасауда. Мәселен, «Ұмытылмас бір күн», «Салауатты өмір салты», «Несібе», «Өзгеге өмір сыйла», «Біз мектепке барамыз», «Жанұяға жылу сыйла» жобаларының жауапкершілігі мен жүгі салмақты. Қиындыққа ұшыраған, мүмкіндігі шектеулі балалардың ой-өрісін арттыратын, жаттығулар үйрететін, спорттық және ойын-сауық шараларды, танымдық саяхаттарды ұйымдастыруға бағытталған жобаны да белсенді атқарып келеді.
Қоғамдық қор жыл сайын 1000 отбасын азық-түлікпен, 2000 отбасын киім-кешекпен, 100 отбасын көмірмен қамтамасыз етеді. Бұдан бөлек, айтылмағаны қанша… Әсіресе, індет өршіген кезде қоғамдық қор жергілікті кәсіпкерлермен бірігіп, аймақтағы ауруханаларға оттегі концентраторын алып берді. Сонымен қатар тігін цехтарында бетперде тігуді үйлестіріп, халыққа тегін таратты. Осы орайда Мемлекет басшысы қайырымдылық пен волонтерлықтың пандемия кезінде жалпыұлттық сипат алғанын атап өтіп, оның әлеуметтік нормаға айналғанын және халықтың дұрыс қабылдағанын айтқан болатын. Күрделі кезеңде сырт қалмай, отандастарына көмек қолын созған, мейірімділік, ізгілік танытқан әр азаматқа ризашылығын білдірген еді.
– Сан қилы тағдыр бар. Бірі жақындарынан, бірі денсаулығынан айырылып, жұмысқа жарамайды. Көпбалалы отбасында қажеттілік көп. Кейде ата-ана тапқан нәпақасын жеткізе алмай қалады. Жыл сайын қаншама мүмкіндігі шектеулі бала өмірге келеді. Ал, оларды қалыпты ортаға бейімдеу, назар аудару үлкен күшті талап етеді. Көмекке шын мұқтаж адамдарды бей-жай қалдыруға болмайды. Біздің қор осындай мақсатта жұмысын бастаған болатын. 6 жылдың ішінде тындырымды жұмыс атқарылды. «Көп түкірсе –көл» демекші елмен бірігіп, көңіліне кірбің түскен жандарға пайдамызды тигізудеміз. Қаншама отбасын көрдік. Қолдадық, сенім білдіріп, демедік. Жас балалардың жалындаған үмітін сөндірмеуге тырыстық, – дейді ол.
Асхаттың айтуынша, қайырымды істерге белсене атсалысатын кәсіпкерлердің, жүрегі жомарт жандардың саны өте көп. Игі бастамасына қолдау білдіріп, қаржылай үлес қосуда. Олар өз еркімен өзгеге қуаныш сыйлауға дайын. «Келісіп пішкен тон келте болмайды» дегендей, бірлесіп, жұмыла әрекет етіп келеді.
Қайырымдылықты қайырлы іс санайтын азаматтар «Жақсылықты басыңа қыл, басыңнан асса, досыңа қыл» деген аталы сөзді ұстанымдарына айналдырған.
– Кез келген кәсіпкер болсын, басқа адам болсын мәселе айтқан кезде бетімізді қайтарған емес. Қайта қолдай кетеді. Бірде қайырымдылық шарасында жүргенде демеуші азамат тозығы жеткен үйді көріп, қасынан жай өтіп кете алмады. Үй иесіне қолдау білдіріп, құрылысына қаражат бөлді. Біздің еріктілер істі аяғына дейін жеткізді. Жақсылыққа құмар жандар жасап жатқан жұмыстарын жария етпейді, – дейді ол.
Дегенмен, соңғы уақытта масылдық белең алып барады. Аяқ-қолы бүтін, он екі мүшесі сау адамдардың мемлекеттен берілетін жәрдемақыға және еріктілер, қоғамдық ұйымдар тарапынан берілетін көмекке сеніп алғаны жанына батады. Өкініштісі, олардың көбейіп жатқаны. Тіпті, жолдасын жасырып, жалғызбасты анамын дегендер де кездесетінін жеткізді. Ер адамдардың отбасы жауапкершілігінен қашатыны – көптеген мәселенің туындауына себеп. Ащы судың жетегінде кеткен азаматтар баласының емес, құтының түбін ойлайтыны жасырын емес. Кейіпкеріміз мұндай отбасылардың көптеп кездесетініне қынжылды.
– Несін жасырамыз, тұрмысы төмен отбасыларына қолдау білдіріп, бір-екі рет көмектескеннен кейін олар да талпынуы керек ғой. Екі қолға бір күрек таба алмай жүргендерге де жұмыс таптық. Бірақ ұзамай тастап кетеді. Қолдан келген мүмкіндікті жасаймыз. Бірақ бәрібір өз дегендерін істеп, қалыпты өмірлеріне оралады. Түйгенім, адамда намыс болмаса, бәріне қолын бір сілтейді екен. Осы көріністі көрген біздің де еңсеміз басылып қалады, – дейді ол.
Асхат ата-аналар балаларын құрал ретінде пайдаланатынын да жасырмады.
– Баласын жетектеп, олардың көзінше жағдайын айтып көмек сұрайды. «Бала ертіп келмеңіз, ол сіздің халіңізді көрмеуі керек. Кез келген бала өзінің ата-анасын жоғары бағалауы маңызды. Ал, оған ата-ана лайық бола білуі тиіс» деп үнемі ескертемін. Бірақ мұны ескеріп жатқан анасы не әкесі жоқ. Біздің балалық шағымыз тәуелсіздік алған тұста өтті. Дүкен сөрелері бос, жұмыс аз. Бір отбасында қаншама бала болды. Бірақ ата-анамыз жасымай, ауыртпалықты сездірмей бақытты балалық шақ сыйлады. Ешкімге алақан жайған жоқ. Жер жыртып, егін екті, төрт түлікті түлетті. Еңбектен бел жазбады. Олар өзгеден көмек сұрауға арланды. Намысы мен ұяты жібермеді. Қазір ше? Керісінше, қит етсе жағдайын айтып, өзгеге өкпелейтіндер көбейген. Масылдыққа бой алдырып, «алма піс, аузыма түстің» күйіне жеткен. Осындай жайларды көріп, жалқаулық жеңіп бара ма деген ойға қаламын, – дейді А.Байдәулетов.
Осы орайда қоғамдық ұйым жаңа тың жобаны іске асыра бастады. Жастардың білім алуына, жоғары оқу орнына түсіп, маман атануына жағдай жасамақ. Оқу орталықтарымен келісім жүргізіп, баланың тегін білім алуына, өзін жан-жақты дамытуға мүмкіндік сыйлауда. Себебі баланы жастайынан еңбекке, білімге баулыса, жоғарыда келтірген мысалдарға бой алдырмайтынына сенімді.
Қолынан келгенше қоғамға пайда келтіруді бақыт санайтын Асхат қайырымдылық ісі бойына рух беріп, жігерлендіретінін де айтты.
Сара АДАЙБАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
