Қармақшы ауданының Қуаңдария ауылындағы №186 орта мектебін өткен оқу жылында 7 түлек тәмамдады. Шағын ауылдан түлеп ұшқан талапты шәкірттердің барлығы да білім грантын иеленіп, қазір еліміздің түкпір-түкпірінде оқып жатыр.
Бұл мектеп жарты ғасырдан астам тарихында мыңдаған шәкіртке жолдама беріп, қанатын қатайтқан. Осыдан ширек ғасырдай уақыт бұрын өзіміз ұшқан алтын ұяның жақсы жаңалықтарын қалт жібермеуге тырысамыз. Соңғы жылдары шалғайдағы ауылға жаңа мектеп салынып, барлық заманауи оқу құрал-жабдықтарымен қамтамасыз етілді.
Жақында мектеп директоры Жанұзақ Ордановпен жолыққанда «биылғы оқушыларымыздың бәрі грантқа түсті» деген қуанышты хабар айтты. Бітірушілер Ұлттық бірыңғай тестілеуге түгел қатысып, 72 мен 100 аралығында балл жинады. Химия, биология, география, математика пәндерінен жақсы нәтиже көрсетті.
Қазір мектеп түлектері Мадина Ибадулла мен Айзере Басқынбай Е.Бөкетов атындағы мемлекеттік университеттің «Фармацевтика», Аружан Бекқұл мен Шакарбану Рамадинова М.Қозыбаев атындағы мемлекеттік университеттің «Дефектология», «Мектепке дейінгі даярлық», Ақділдә Байшуақов пен Бексұлтан Құснадин Ш.Құдайбердиев атындағы мемлекеттік университетінің «Геодезия және картография», Өміркүл Шілдебаева Қ.Жұбанов атындағы мемлекеттік университеттің «Бастауышты оқыту әдістемесі» мамандықтарында білім алуда. Бұл – сөз жоқ, ата-аналар үшін де, ұстаздар үшін де зор қуаныш. Шәкірттердің өздері болашақта таңдаған мамандықтарын меңгеруге күш салып жүр.
Соңғы жылдардағы білім гранттарының көбейгені, оған «Серпін» бағдарламасы, облыс әкімінің гранты сияқты мүмкіндіктердің қосылғаны, әсіресе, шалғай ауылдағы шәкірттердің жолын ашты, білімге деген ұмтылыстарын қанаттандырды. Оның нәтижесі қуаңдариялық түлектердің жетістігінен айқын аңғарылады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
