Ең бастысы – ел мүддесі

257

0

 Әкімдердің халық алдында есеп беруі жалғасуда. Бүгінге дейін 2 кент пен 12 ауылдық округте халықпен кездескен Қармақшы ауданының әкімі Мұса Қалдарбеков Ш.Төлепова атындағы мәдениет үйінде өткен есепті кездесуде жылды түйіндеп, биылғы жоспарларын жеткізді. Жиынға ҚР Президентінің «Байқоңыр» кешеніндегі арнаулы өкілі, облыс әкімінің орынбасары Бақытжан Намаев, облыстық басқарма өкілдері, ардагерлер, жергілікті тұрғындар, үкіметтік емес ұйым жетекшілері, бұқаралық ақпарат құралдары өкілдері мен мекеме, кәсіпорын басшылары қатысты.
Ауданға «көгілдір отынның» келуімен көпшілік көкейіндегі сауал­дар көбейген. Тұрғындар табиғи газ­ды тұтынуға асық. Былтыр Жосалы кентіне газ жеткізу, кварталішілік газ тарту желілерінің құрылысы үшін рес­публикалық, облыстық бюд­жет­тен барлығы 753,3 млн теңге қаржы бөлінді.
– Бұл қаржыға биыл Жосалы кентіне газ тарту жұмыстары басталды. Өткен жылы Т.Көмекбаев елді мекеніндегі №185 орта мектептің бу қазандығын сұйытылған газға ауыстыруға аудандық бюджеттен 23,1 млн теңге бөлініп, жұмыс толық аяқталды. Оған қоса, бірқатар білім ошағында осы бағыттағы жұмыс жал­ғасуда. Биыл Төретам кентіне,  Ақай елді мекеніне газ таратудың жоба-сметалық құжаттамасын әзір­леу­ге қаржы бөлінді, – деді М.Қал­дарбеков.
Ауданда жол мәселесі де шешімін тауып келеді. Өткен жылы аудандық маңызы бар «Самара-Шымкент-Ақжар-Көмекбаев» автомобиль жо­лы­ның күрделі жөндеу жұмысына облыстық бюджеттен 22,8 млн теңге қаржы бөлініп, оның 500 метр бөлігі күрделі жөндеуден өткізілді. Одан бөлек, елді мекендерде жол жөндеу, жарықтандыру жұмыстары жүйелі жүргізілді.
Қармақшыдағы түйіні тарқамаған түйткілдің бірі – жазғы демалыс лагері еді. Бұған дейін балаларды көр­шілес облыстар мен аудандардың лагеріне жіберді. Аудан әкімі жұртшылықпен жүздесуде «Жосалы кентіндегі жыл бойы балалар дема­латын лагерь құрылысын уақытылы аяқтау үшін тиісті басқармалармен тығыз байланыстағы жұмыс жал­ғасатын болады» деп атап өтті. Айта кетейік, лагерь құрылысына облыстық бюджеттен 2017 жылы 100 млн теңге, 2018 жылы 200 млн теңге қаржы бөлінген. Ал нысанның жалпы құны – 1 млрд 292 млн теңге.
Кент, ауылдық округтерде нәти­желі жұмыспен қамтуды және жаппай кәсіпкерлікті дамыту бағдарламасы аясында жаңа тұрақты жұмыс орын­дарын құру, өндіріс пен қызмет көрсету бағытында кәсіпкерлік жобаларды іске асыру жіті назарда.
– Кәсіпкерлік саласының жан­дануы қандай кезеңде де болмасын тұрғындардың әл-әуқатының артуына әсерін тигізеді. Статистикалық мәлі­мет­терге сәйкес, өткен жылы ауданда тіркелген кәсіпкерлік субъектілердің саны 3206 болса, оның 90,5 проценті немесе 2900-і жұмыс істеп тұр. Оның ішінде 438 нысанның ішкі қаржылық айналымы 2 млн теңгеден асады, – деді аудан әкімі.
Абаттандыру, көгалдандыру жұ­мыс­тары толастамайды. Бұл үшін 75,9 млн теңге қаралған. Санитарлық тазалық жұмыстарына 16,5 млн теңге, жарықтандыруға 28,3 млн теңге бөлінген.
Есепті кездесуде аудан тұрғын­дары атқарылған жұмыстарға лайық­­ты баға беріп, алғыс білдірді. Ұсыныстарын жеткізді. Көкейкесті сауалдарына тұшымды жауап алды.
Дәулет ҚЫРДАН.
Қармақшы ауданы.