Елбасы Н.Назарбаев “Ассамблея – еліміздегі бірлік пен келісімнің киелі бесігі, тұтастық пен тұрақтылықтың құтты шаңырағы” деп құрылымның қоғамдағы маңыздылығын айқындап берген болатын. Бүгінде ҚХА атқаратын жұмыс ауқымы кеңейіп, мазмұны күн санап артуда. Себебі, Ассамблея – тек этномәдени бірлестіктерді ғана емес, бүкіл халықты бірлікке үндейтін белді ұйым.
Облыстық Қазақстан халқы Ассамблеясы аймақтағы қоғамдық келісімді, саяси тұрақтылық пен жалпыұлттық бірлікті нығайтуда жүйелі жұмыстар атқаруда. Мәселен, “Рухани жаңғыру” бағдарламасы аясында «Қайырымдылық керуені» акциясы, «Ұлы дала елі» тарихи-танымдық экспедициясы және «Сыр елі – достық мекені» атты жобаларын қолға алды. Сонымен бірге аймақта меценаттардың қолдауымен 798 қайырымдылық іс-шара ұйымдастырылып, 24794 адамға 270 млн 809 мың теңгенің көмегі көрсетілген. Оған қоса этномәдени бірлестіктердің қатысуымен «Сыр елі – достық мекені» жобасы аясында «Славяне» этномәдени бірлестігінің 20 жылдығы, татар этномәдени бірлестігінің негізін қалаушы, белгілі ұстаз Н.Ахмадееваның 100, корей халқының ұлттық батыры Хон Бом Доның 150 жылдығы жоғары деңгейде аталып өтілді. Өзбекстанның Қазақстандағы жылы шеңберінде өзбек халқының тарихын, салт-дәстүрін насихаттайтын түрлі шаралар ұйымдастырылып, «Достық – баға жетпес байлық» тақырыбындағы салтанатты шарамен қорытындыланды.
– Біздің жұмысымыз – этномәдени бірлестіктерді көрсету ғана емес, ел ішіндегі тұрақтылықты сақтау. Осы мақсатта Ассамблея жанындағы қоғамдық келісім кеңестері туралы да айтуға болады. Олар – мемлекеттік бағдарламаларды, жаңа өзгерістер мен заңдарды, әкімдіктердің қолға алған жұмыстарын әрбір тұрғынға жеткізуге барынша атсалысуда. Мысалы, өткен жылы облыс бойынша 165 қоғамдық келісім кеңесі жұмыс істеді. Олардың ықпалымен аймақ тұрғындарының 255 әлеуметтік мәселесі шешімін тауып, тиісті мемлекеттік нысандарға 109 ұсыныс берілді. Бұдан бөлек, аналар кеңесінің жұмысына да аса мән беріп отырмыз. Себебі, жастар арасында көп болып кеңесетін мәселе жетерлік. Осыған сәйкес Аналар кеңесі «Шаңырақ» жас қыз-келіншектер клубымен, жас отбасыларға әлеуметтік-психологиялық кеңес беру орталығымен, «Сыр аналары» қоғамдық қорымен, «Бекзаттар мен бекзадалар» клубымен тығыз жұмыс жасайды. Сонымен қатар, «Ұрпақтар сабақтастығы», «Қызы мен анасы» және тағы басқа маңызы зор жобаларды қолға алып келеді. Оған қоса, кеңестің ұйымдастыруымен Аналар форумын өткізу дәстүрге айналды, – дейді облыстық ҚХА хатшылығының меңгерушісі Л.Төрешова.
Елімізде 2011 жылы “Медиация туралы” заң қабылданғандығы белгілі. Алайда, сол уақыттан бері даулы мәселені сотқа жеткізбей шешуде медиация ұйымдарының жұмыстарынан белсенділік байқалмаған. Бірақ соңғы жылдары аталған ұйымның жұмысына жүгінушілер қатары көбеюде. Бүгінде өңірде 57 кәсіби және 615 кәсіби емес медиатор тіркеліп отыр. Соның негізінде кәсіби емес медиаторлар 371 дауды кеңес беру сатысында шешті, 543 дау сот алдында шешімін тапты. Ал, кәсіби медиаторлар арқылы сотқа жеткен 2351 дау қысқартылған. Осы ретте, сотқа жеткізбей, мәселені дау-дамайсыз шешуді алғаш болып қолға алған Сыр өңірі екенін айта кеткен жөн.
ҚХА-ның бастамасымен өткен жылы қыркүйек айында өңірімізде республикалық «Қазақтану» мәдени-ағартушылық жобасы өтті. Шараның қазақы қаймағы бұзылмаған Сыр өңірінен бастау алуының өзі үлкен мәнге ие. Кешенді жоба аясында ғылыми конференция, танымдық лекциялар, оқыту семинарлары, Қоғамдық келісім кеңестерінің республикалық жиыны, медиация бағыты бойынша оңтүстік өңірлік семинар-тренингтері ұйымдастырылды. Оған К.Мырзагелді, Б.Әбдіғали, Қ.Ергөбек, Н.Жүсіп секілді белгілі ғалымдар мен қоғам қайраткерлері қатысты.
Облыстық ҚХА атқарып жатқан ауқымды шаралар мұнымен толастамайды. Өңірдің барлық буын өкілдерін бір шаңырақ астына біріктіріп, ұлт мүддесі жолында ұтымды жұмыстар жасап отырған құрылым жастар тәрбиесі бағытында да толымды тірліктер істеп, олардың қоғамнан өз орнын табуына атсалысып келеді. Осыған орай, «Жаңғыру жолы» жастар қозғалысы құрылды. Қазіргі сәтте ол этнос жастарын біріктіруші күшке айналды. Олардың ұйымдастыруымен «Ұлы Дала Елінің киелі мұрасы» республикалық тарихи-экологиялық акциясы», «Қамқор», «Тағзым» акциясы және тарихи-экологиялық экспедициясы жүзеге асырылып, 40-қа жуық түрлі форматтағы шара өткізілді.
Көктемнің алғашқы күнімен тұспа-тұс келетін «Алғыс айту күні» де облысымызда ерекше аталып өтеді. Қазіргі таңда бұл бағытта да түрлі шаралар қолға алынып, бір ай бойына ауқымды жұмыстар атқарылуда.
– «Алғыс айту күні» – бұл, ең алдымен, елімізде тыныштық пен өзара сенімділік, барлық қазақстандықтардың бір-біріне деген құрметінің орнығуына негіз болатын идея. Мерекенің негізгі мазмұны – әрбір адамның бір-біріне жақсылық пен жылулық сыйлауы, жетім балаларға қол ұшын созу, қамқорлыққа зәру адамдарға көмектесу, үлкеннің кішіге деген сүйіспеншілігін, кішінің үлкенді сыйлауы, азаматтар арасындағы сыпайылық қарым-қатынасын дамыту, әдептілік, кішіпейілділік, ізеттілік қағидаларын дәріптеу. Өмірдің әрбір сәтін бағалай отырып, шексіз риясыз көңілмен алғыс айту, – дейді хатшылық меңгерушісі.
Өңірде 1 ақпаннан бастап өтілетін шаралар жоспары бекітілді. Мәселен, «Әлем елдеріндегі алғыс айту дәстүрлері» тақырыбында оқу орындарында лекциялар ұйымдастырылса, әлеуметтік желілерде «Шын жүректен» атты видеоролик ұсынылды. Сондай-ақ, «Менің алғысым» тақырыбында балабақшалар мен мектептерде сурет салу мен «Алғыс айту – парызым» атты оқушылар мен студенттер арасында эссе жазу байқаулары өткізілді. Мұнан басқа «Сыбаға» қайырымдылық акциясы қолға алынды. Алдағы күндері «Алғыс арқалаған жандар» тақырыбында өткізілетін іс-шаралар барысында үлгілі отбасылармен, төтенше жағдайлар қызметінің құтқарушыларымен, «Жаныңда жүр жақсы адам» атты мерекелік кездесулер ұйымдастырылатын болады.
Жалпы, облыстық ҚХА бұдан өзге де түрлі бастамалар мен жобалардың өтуіне ұйытқы болып, ел ішіндегі бірліктің нығаюына, тұрақтылық пен келісімнің берік орнығуына атсалыса береді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
