Тұп-тұнық көк аспан, жап-жасыл жазира дала, толқып аққан Сыр өзені, заңғар көктен алтын арай шуағын шашқан Күн келбеті албырт баланың көз алдында көркем бояумен өріліп, арман-қиялын алысқа жетелейді. Осындай сәттерде ол қылқаламын қолына алатын. Ақ қағаздың бетін айқұш-ұйқыш сызғылап, сол бір – қиялында қылаң берген керемет көріністі мың түрлі бояумен құбылта бейнелеп шығатын. Осылайша шығармашылық жолына түсті.
Бүгінгі әңгімеміздің кейіпкері – Сыр өңірінің дарынды перзенті, суретші Шәкірбек Сәменов 1950 жылы Тереңөзек стансасында туған. 1956 жылы мектеп табалдырығын аттаған ол, 1960 жылы Қызылорда қаласындағы №409 К.Маркс атындағы мектепте оқуын орысша жалғастырады. Сол оқушы күнінен-ақ сурет салуға құштар талантты бала табиғаттың түрлі мезгіл көріністерін, одан бөлек, өмір өрнектерін де тап басып, тамаша бейнелейтін. Оның қарым-қабілетіне ұстаздары да мол сенім артатын.
Арман алға жетелейді. Орта мектепті бітірген бозбала 1969 жылы Абай атындағы Қазақ педагогикалық институтының көркемсурет-графика факультетіне оқуға түсті. Сол студенттік жылдарында осы факультеттің комсомол хатшысы болып, қоғамдық жұмыстарға да белсене араласты.
Суретшілік өнерді негізгі кәсібіне айналдырған Шәкірбек Сәменов 1972 жылдан бастап Қызылорда көркемсурет шеберханасында қызмет атқарып келді. Табиғат берген талантымен талмай еңбек етіп, талай бәсекелі жиындарда топ жарды. Көркем ойлы, эстетикалық әсері мол шығармашылық туындылары арқылы Сыр мәдениетінің өркендеуіне өзіндік үлесін қоса білді. Осы ұжымда кәсіподақ комитетінің төрағасы, шығармашылық секциясының жетекшісі, көркемдік кеңесшісі қызметтерін атқарды. Осынау өнер жолында республика көлеміндегі, шет елдердегі көптеген суретшілермен араласты. Әйтсе де, Қазақстанның еңбек сіңірген өнер қайраткері, график-суретші, Сыр перзенті Салихитдин Айтбаевтай ұстазының есімін әркез құрметпен атайды.
Көркемсурет шебері Ш.Сәменов 1974 жылдан республикалық, бүкілодақтық және шет елдердегі көрмелерге қатысып келеді. 1975-1988 жылдар аралығында Мәскеу, Нүкіс, Хиуа, Көне Үргеніш, Түркіменстан және т.б. жерлерде шығармашылық іссапарларда болып, жұмыс жасады. Бүгінде суретшінің еңбектері Ә.Қастеев атындағы Мемлекеттік өнер музейінде, Қазақстан Мәдениет министрлігі мен «Өнер» көрме дирекциясы қорларында /ДХВ/, сондай-ақ, Германия, Канада және тағы басқа елдердің жеке коллекция қорларынан орын алған.
Ол – 1975 жылы КСРО Жас суретшілер одағының мүшелігіне қабылданған болса, 1981 жылдан КСРО Суретшілер одағының мүшесі. 1988 жылы Қазақстан Суретшілері одағының ХІ-ХІІ-ХІІІ съездерінің делегаты, XII съезінде аталған одақтың басқарма мүшелігіне сайланып, Қазақстан Суретшілер одағының облыстық көркемсурет шеберханасындағы өкілі болып тағайындалды. 1989-1990 жылдары «Арал» бүкілодақтық шығармашылық тобына жетекшілік етіп, Мәскеу қаласында көрмесін өткізеді. Ал 1990 жылы Қазақстан Суретшілер одағы Қызылорда бөлімшесінің бірінші төрағасы болып сайланды. 1992 жылы Мәскеу Бүкілодақтық Суретшілер съезіне делегат болып қатысты. 2009 жылы «Қызылорда облысына 70 жыл» мерекелік медалімен, 2013 жылы Қазақстан Суретшілер одағының 80 жылдығына орай «Үздік шығармашылығы үшін» алтын медалімен марапатталды.
Суретші Ш.Сәменов 2008 жылы Германия, Франция, Австрия, Италия елдерінде шығармашылық іссапарымен жұмыс жасап қайтқан болатын. Осы жылы облыс әкімінің стипендиясын иеленді. Сонымен қатар, республикалық суретшілер симпозиуымына жетекшілік жасап, Қызылорда қаласында көрме ұйымдастырды.
Бүгінде 70 жастың желкенін керіп, ұлын – ұяға, қызын қияға қондырған Шәкірбек аға осынау өмір жолында жеткен жетістіктерін көңіліне қанағат тұтады. Әңгіме арасында үлкен ұлының (мезгілсіз өмірден өткен) суретшілік таланты ерекше болғанын, қазір сол ұлының артында қалған тұяғы, яғни, немересі осы өнерге бет бұрғанын айтты. Сондай-ақ, суретші ағамыздың қызы Ләйла Сәменова да көркем өнерді кәсіп еткен. Ол Ақтөбе қаласында тұрады.
Айта кетейік, облыстық көркемсурет галереясы 2014 жылдан бері жұмыс жасайды. Галерея қорында Қазақстанның белгілі суретшілерінің 300-ге тарта туындылары сақталған. Оның ішінде Шәкірбек Сәменовтің да көптеген көркем шығармалары бар.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
