Сиқырдың сиқы

1718

0

Қасиетті Құранды ашатын «Фатиха» сүресінің бірінші аятында «ғәләмин» сөзі тұр. Бұл – әлемдер деген көпше сөз. Демек, адамзат әлемімен қатарлас бізден жасырылған ғайып әлемдер бары хақ. Олардың бірсыпырасы ғана мәлім, қалғандары сыр. Ал, оған сенім келтіру иманның бұлжытпас мүттәқин шарты әрі әрқайсысы әрқилы.

Ардақты Мұхаммед (с.ғ.с.) пайғамбарымыз аса қауіпті бол­ған ұлы жеті күнәні біздерге тізбектеп берген. Осылардың ішінде адам тағдырын тәлкекке салатын, өмірінің ойранын шығаратын көзбояу­шылық-си­қыр бірінші орында. Бұл зұлматпен айналысу мұсылман пенденің қолынан келе қоймас. Тек иманын Әзәзілге сатып, ата дінінен айырылып, кәпірден төмен деңгейге  түскен жүзеге асырушылардың қолынан келеді. Негізінде, бұл – адамзатқа ­сырттан жасалынатын қастандық, Харут Маруттың үйреткен жақсылық ниетпен де атқаруға болмайтын Алланың ұлы тыйымы. Мұса (ғ.с.) пайғамбар тұсында өркендеп, кейін құлдилаған. Сол себепті, барлық дінде мұнымен  айналысқандарды аямастан жазалаған. Алайда, түп-тамырымен қияметке дейін жал­ғасатын осы жауыздық мұсыл­ман мұсылманға, келіндер қайын жұртқа, достар бір-біріне, әйелі еріне, кәсіпкер серіктестер арасында жиі кездесетін болды.

Шариғи тілде өз болмысын өзгерту үшін жынға, шайтанға қайырылу сиқыр делінеді. Бүгіннің кей адамдары бұл іске жақсы атау беріп, «ақ магия» дейді. Бірақ, атын өзгерткенмен, заты бәрібір өзгермейтін харами дүние. Тіпті адамды адамға қосу, бір-біріне жақсы көрсету, қарызын қайтарту үшін жасалса да. Жалпы, сиқырмен дуалау, жын ұру, көз тию дегендердің шығатын жері бір – имансыздықтың бастауы. Қыз­ғаныш оның түртпегі, қаражат оның ілмегі. Бүгінде осы бір кесапат кесірмен айналысушылардың саны көбейсе, оған жүгінушілердің қатары азаймай отыр. Бұл жөнінде Құранның бірнеше аяттары мен сүрелері бар. Мұхаммед (с.ғ.с.) пайғамбарымызды да сиқырлаған. Оның (с.ғ.с.) хадисінде көп адамның көз тиюден өлетіндігі айтылса, адамды қабірге, хайуанды қазанға түсіретінін де айтқан. Көз тию бар, ол – ақиқат. Қазақта «Көз тиеді, көз тимесе сөз тиеді» дейді, яғни, «көзі бар» адамдардың да, жындардың да сұқтана қарауы.

Жобада осы тізбектің дерлік белгілері бір-біріне ұқсас. Олардың қатарында адамның рухани құлазуы, құлықсыздығы, бедеулігі, түсік тастау жиілігі, жұмысының жүрмеуі, себепсіз жылауы, бет-жүздің қараюы не сарғаюы, жалғыздықты сүюі, ешбір нәрседен ләззат алмауы, барлық мәселеде тұрақсыздығы, бір аурудың асқынуы, емі табылмауы, сырқаттың ұзауы, жүректің қысылуы, тым қатты есінеуі немесе кекіруі айтылған. Осының бәрі – адамды толықтай өзгертеді, яғни жүйкесі сыр береді, рухани құлазиды, жалқау тартады, ашушаң келеді, өз-өзіне сөйлейді, орынсыз күледі, дірілдеп-қалшылдайды, түбінде өз-өзіне қол жұмсауы да әбден мүмкін кесел. Әрі мұның ең үлкен белгісі – адамның себепсіз үнемі сұлқ құлай беруі.

Түнде бастырылу, қорқыныш пен үрейлі түстер көру, биіктен құлау, ит-мысық көру, лас нәрсені (түсінде) жеп-ішу, қашу, қылғыну, буыну ұдайы көрініп, түс немесе өңі екенін білмейтін күйге түседі. Бұл белгілердің басым көпшілігі әркімде әрқалай сипатта болуы мүмкін. Тек ең жоғары дәрежеге жеткенде, түстегі қорқынышы өңіне айналып, елестері нақты күндізгідей көрінетін болады. Дегенмен, ең негізгісі дәстүрлі медицинаға қайырылып, ем-домдық кәсіби дәрігердің көмегі болмағанда, яки табылмағанда ғана күмәнға алынып, тиісті шараларға кезек күттірмеу қажет. Жалпы, бұл рухани кеселден емделудің екі жолы көрсетілген. Біріншісі, қасиетті Құранның ұлы дұғаларымен айығу болса, екіншісі – дәл сондай сиқыршының үлкенірегіне бару. Тек, екінші жолына шариғат тыйым салады.

Аурулар екіге бөлінеді: дене және рух. Рух кеселіне жын әлемінің тікелей әсері бар. Бұл қасіреттен сақтанудың негізгі жолы мыналар: саф таза ақида (сенім) ұстану арқылы жаратқан жалғыз Аллаға иманы мен үміті нық болу, күнә атаулыдан алыс болу, әуретті жердің жабық жүруі, бірде-бір жаратылысқа нақақтан (әдейілеп) жазықсыз зияндық көрсетпеу. Ұдайы ғұсыл-дәретпен таза жүру, құлшылық жасау, сүннет, дұға-тілектерге сүйену. Қатты қуану мен қайғыда өз-өзін жоғалтпау, сабыр сақтау және көпшілік жамағатпен бірге болу.

Бүгінде сиқыр мен дұға, көз тию себептерінен кейбір жүздерді қайғы шалған, отбасыларда үрей ұялаған, санадан алжасқан, шаңырағынан өздеріне мүлде тиесілі болмаған заттар мен түйіншіктер табылып жатқан жағдаяттар көп. Тіпті, зират басында, қабір жанында, оның құлыптасында тескілене жыртылған, кес­кіленген суреттердің, әр нәрселердің табылып жатқандығы көпшіліктің алаңдау­шылығын туғызуда. Бұл – анық сиқыр. Ал, сапырылысқан балгерлер, бақсылар, көріпкелдер, жол ашушылар – осы сиқыр, жын әлемінің әскерлері. Ал, олардың қара қойлары мен тауықтары, маңдай мен қабырғаға жаққан қандары – сиқырдың элементтері. Зират-моланың топырағы, тұз бен шекер, ине шаншылған қуыршақтар, баршасы – осы ұлы апатты күнәнің аспаптары.

Осы күпір істермен айналысқандардың өздері, тұқымдарымен қоса зардап шегетінін баса айта келе, оларға қа­йырылып, көмек сұраудың өзі опық жегізетін имансыз қарабет қылықтар екендігін тағы да еске салғым келеді. Қорыққанға қос көрінгендей, әрбір нәрселерден үрейлене бермеу керек. Ала жіп пен инеден, шырпы мен шүберектен үркімей, жалғыз Жасаған Алламызға тәуекелімізді кемелдендіруге ша­қырар едім.

Нұрлан қажы БАЙЖІГІТҰЛЫ,

дінтанушы, имам

 


>>> Біздің Facebook, Instagram парақшаларымыз бен Telegram каналымызға жазылыңыз! <<<