Қазіргі таңда облыстағы мектептердің 93,1 проценті кеңжолақты интернетке қосылған. Сонымен қатар, мемлекеттік-жекеменшік әріптестік негізінде 8096 ескі компьютер жаңартылып, заманауи пәндік кабинеттер және 3D зертханаларымен қамтылатын болады. Бұл туралы облыстық білім басқармасының басшысы Майра Мелдебекованың мәлімдемесіне сілтеме жасап, облыс әкімінің баспасөз қызметі хабарлайды.2018-2019 оқу жылында 154 559 оқушы, оның ішінде 18 942-сі бірінші сыныпқа барады. Жаңа оқу жылының қарсаңында Қазалы және Жаңақорған аудандарында жаңа мектептер пайдалануға берілді, жыл соңына дейін Арал қаласында 300 орындық және Қызылорда қаласында 600 орындық білім ошағы ашылады.
«Облыстағы қалған білім ошақтарында ағымдағы жөндеу жұмыстары жүргізілді. Бүгінгі таңда облыстың жалпы білім беру мектептерінің 93,1%-і кеңжолақты интернет желісіне қосылған, жыл соңына дейін қалған мектептер толығымен қамтылады. Мемлекеттік- жекеменшік әріптестік шеңберінде білім ұяларындағы 8096 ескірген компьютерді ауыстыру жоспарлануда. Бұдан басқа, 242 мектеп электрондық журнал «Күнделік» жүйесінде жұмысын бастайды», – деді басқарма басшысы.
Айта кетейік, облыс орталығындағы барлық балабақшаларда «Электронды балабақша» жүйесі қосылған, басқа да мектепке дейінгі мекемелер жаңа оқу жылында қосылады.
Жаңа оқу жылынан бастап 3,6,8-сыныптар жаңартылған мазмұндағы білім беру бойынша оқиды. Қырық алты инновациялық мектепте физика, информатика, химия және биология пәндері ағылшын тілінде оқытылады. Облыста 649 мұғалім ағылшын тілі курсынан өтті.
Сонымен қатар, 156 мектеп физика, химия, биология пәндерінің кабинеттерімен 92 мектеп робототехника кабинеттерімен, 9 оқушылар сарайы «3D зертханалармен» жабдықталады. Қалалық және ауылдық мектептер деңгейін теңестіру бағытындағы шаралар аясында шағын жинақталған мектептер Bilim Book кешенімен қамтылады.
«Өздеріңіз білетіндей, Жалағаш ауданы, Шәменов ауылындағы 2018 жылы апаттық деп танылған мектептен басқа облыста үш ауысымдық білім беру және апаттық мектептер жойылды. Оқулықтар мен оқу-әдістемелік кешендерді сатып алуға 1,5 млрд теңге бөлінді. 1 тамыздан 30 қыркүйекке дейін «Мектепке жол» дәстүрлі республикалық қайырымдылық акциясы өткізіледі. Қазірде, онда 4 мыңнан аса бала 22 миллион теңгеден астам қаражат көлемінде көмекке ие болды», – деді Майра Мелдебекова.
Жаңа оқу жылында «Рухани жаңғыру» бағдарламасы аясында 5-7 сыныптар бойынша «Өлкетану» пәні, сондай-ақ, биылдан бастап 3-сыныптарда «Ақпараттық-коммуникациялық технологиялар» пәні енгізілетін болады.
Естеріңізге салайық, өткен оқу жылында 7113 мектеп бітіруші түлектің 4742-сі Ұлттық бірыңғай тестілеуге қатысқан. ҰБТ-ның орташа балы 85,2% құрады. 2732 түлек мемлекеттік білім беру грантына ие болды. Сондай-ақ, облыс әкімінің 205 гранты, 43 ректор гранты, Мәскеу мен Санкт-Петербургтің жетекші жоғары оқу орындарының 70 гранты мен ЕурАзЭҚ Парламентаралық Ассамблеясының жанындағы университетіне 10 грант бөлінді. 39 грант әскери оқуға және шетелдік университеттерге 29 грант бөлінген. Осылайша, 3 мыңнан астам сырбойылық түлек грант негізінде білім алады.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
