«АҚТАУ – ҚЫЗЫЛОРДА – АҚТАУ» БАҒЫТЫ ІСКЕ ҚОСЫЛДЫ
«SCAT» әуе компаниясы «Ақтау – Қызылорда – Ақтау» бағыты бойынша субсидиялық жаңа әуе рейсін іске қосты. Алғашқы рейспен 146 жолаушы Қызылордаға келсе, дәл осындай жолаушы Ақтауға аттанды.
Жаңа бағыт рейстері «Boeing» әуе кемесімен аптасына екі рет – сәрсенбі және сенбі күндері ұшады. Ақтау қаласынан шыққан ұшақ Қызылордаға сағат 16:00-де қонып, Қызылордадан Ақтауға сағат 17:00-де ұшып шығады. Билет құны бір бағытқа тұрақты түрде 25 000 теңге.
ҚР Премьер-министрінің бірінші орынбасары Нұрлыбек Машбекұлының қолдауымен ұйымдастырылған алғашқы рейсті дәстүрге сәйкес әуежайдағы су аркасымен салтанатты қарсы алу рәсімі өтті.
Жаңа әуе бағыты өңіраралық байланысты нығайтып, жолаушылардың мүмкіндігін кеңейтеді. Сондай-ақ туристік және іскерлік байланыстарды дамытуға оң ықпал етеді.
ГАЗ БАҒАСЫ ҚЫМБАТТАЙДЫ
«Қазақстанда 1 шілдеден бастап көтерме газ бағасы орта есеппен 33 пайызға өседі. Бұл туралы Энергетика вице-министрі Қайырхан Тұтқышбаев мәлімдеді» деп хабарлайды Egemen.kz.
Вице-министрдің айтуынша, бұл шешім жылыту маусымынан кейінгі газ инфрақұрылымын жаңарту қажеттілігіне байланысты қабылданған.
– Өзгеріс тек көтерме бағаларға қатысты болып отыр. Бұл бағытта орташа өсім 33 пайызды құрайды, өңірлер бойынша нақты бөлінісі бар. Бұл саланы инвестициялық тұрғыдан тартымды етуіміз керек, – деді ол.
Вице-министр газ бағасын көтеру инфляциялық және экономикалық факторлармен де байланысты екенін атап өтті. Сонымен қатар министрлік өкілі көтерме бағаның өсуі тарифтердің бірден қымбаттауына әкелмейтінін айтты.
КИБЕРҚАУІПСІЗДІК МАМАНДАРЫН ДАЯРЛАУ БАСТАЛДЫ
«Қазақстанда «Red Team & Blue Team Cyber Academy» білім беру бағдарламасына іріктеу аяқталып, киберқауіпсіздік саласында тегін білім алатын 100 грант иегері анықталды» деп хабарлайды KAZINFORM ақпарат агенттігі.
Жасанды интеллект және цифрлық даму министрлігінің мәліметінше, жобаға еліміздің барлық өңірінен 1567 өтінім түскен. Іріктеу нәтижесінде 361 қатысушы «Ұлттық киберқалқан» CTF-турниріне қатысып, оның қорытындысы бойынша үздік 100 адам грант жеңіп алды.
– Білікті кадрларды даярлау – бүгінде мемлекетіміздің цифрлық егемендігінің негізі. «Red Team & Blue Team Cyber Academy» бағдарламасы қазіргі заманғы киберқауіптерге тиімді қарсы тұруға және Қазақстанның маңызды цифрлық инфрақұрылымының тұрақты жұмыс істеуін қамтамасыз етуге қабілетті сарапшылардың жаңа буынын қалыптастыруға бағытталған, – деді Жасанды интеллект және цифрлық даму вице-министрі Досжан Мұсалиев.
Жоба IT саласында базалық білімі бар 18 бен 45 жас аралығындағы азаматтарға арналған. Қатысушылар алты ай бойы онлайн форматта оқып, киберқауіпсіздік саласындағы практикалық дағдыларды меңгереді.
2 МЫҢҒА ЖУЫҚ ЕГІЗ ЖӘНЕ 54 ҮШЕМ
Елімізде төрт айда 2 мыңға жуық егіз және 54 үшем дүниеге келді. Үшемдер бойынша Түркістан облысы, Атырау облысы және Шымкент қаласы алда.
«Ұлттық статистика бюросының мәліметінше, 2026 жылдың қаңтар-сәуір айларында 1926 егіз және 54 үшем тіркелді. Бұл кезеңде төртемдер тіркелмеген» деп хабарлайды Aikyn.kz.
Егіздер саны бойынша Түркістан облысы көш бастады. Одан кейін Алматы қаласы (245) және Алматы облысы (175).
2026 жылғы қаңтар-сәуір айларында дүниеге келген балалардың жалпы саны 99,4 мыңға жетті. Туу көрсеткішінің ең жоғары деңгейі Түркістан облысында (1000 тұрғынға шаққанда 19,75), Шымкент қаласында (19,39) және Маңғыстау облысында (19,28) тіркелді.
«СБ» ақпарат
