Бұқаралық ақпарат құралдары қызметкерлерінің кәсіби мерекесі қарсаңында Ақордада өткен салтанатты рәсімде Мемлекет басшысы Қасым-Жомарт Тоқаев саланың бірқатар өкілін мемлекеттік наградалармен марапаттады. Президент өз сөзінде журналистердің қоғамдағы маңызды рөлін атап өтіп, олардың мемлекеттік саясатты түсіндіру, халық пен билік арасындағы сенімді нығайтудағы еңбегіне жоғары баға берді.
Мерейлі жиында белгілі тележурналист, «Qyzylorda» телеарнасының ардагері Жағыппар Қарабала «Парасат» орденімен наградталды.
Жағыппар Аманжолұлының еңбек жолы журналистикаға адалдықтың, кәсіби шеберліктің және туған өлкеге деген жанашырлықтың жарқын үлгісі саналады. Көпжылдық тәжірибесі мен талапшылдығының арқасында Сыр өңірінде телевизияның кәсіби мектебін қалыптастырды. Бүгінде сол мектептен шыққан мамандар отандық ақпарат кеңістігінде табысты еңбек етуде.
***
Мемлекет басшысынан марапат алғандар қатарында жерлесіміз, белгілі ғалым, филология ғылымдарының докторы, профессор Амантай Шәріп те бар. Оған «Қазақстанның еңбек сіңірген қайраткері» құрметті атағы берілді. Бұл марапат оның ғылым мен білім саласындағы көпжылдық еңбегі мен ел руханиятын дамытуға қосқан үлесінің жоғары бағаланғанын көрсетеді.
Амантай Шәріп қазақ әдебиеті мен журналистикасының өзекті мәселелерін зерттеп, ұлттық құндылықтарды насихаттауға зор еңбек сіңірген ғалым ретінде кеңінен танымал. Ол ғылыми-зерттеу жұмыстарымен қатар, ақпарат саласында да белсенді қызмет атқарып, әр жылдары «Qyzylorda» телеарнасын басқарып, өңірлік журналистиканың дамуына елеулі үлес қосты.
Ғалымның басшылық кезеңінде телеарна мазмұндық тұрғыдан жаңарып, өңірдің қоғамдық-саяси, мәдени және рухани өмірін кеңінен насихаттайтын маңызды ақпараттық алаңға айналды.
***
Кәсіби мерекеде жерлестеріміз, тележүргізуші Қымбат Досжан және Гүлмира Дайрабай «Құрмет» орденін, Президент телерадиокешенінің аға телеоператоры Жаңабай Ахметов, «Abai TV» телеарнасының редактор-продюсері Сәуле Алдамұратқызы «Ерен еңбегі үшін» медалін алды.
Бұл – Сыр өңірінде қалыптасқан, қанатын кең жайған журналистика мектебінің мерейі! Марапатқа ие болған әріптестерімізді құттықтап, шығармашылық қызметіне толағай табыс тілейміз.
