Жаз мезгілі – балалар үшін демалыс пен қызықты сәттердің, жаңа білім мен жарқын әсерлердің кезеңі. Биыл Қызылорда қаласында оқушылардың жазғы демалысын тиімді ұйымдастыруға ерекше көңіл бөлініп отыр. Қалалық білім бөлімінің мәліметінше, 70 мыңнан астам оқушының 98,5 пайызының бос уақытын мазмұнды өткізу жоспарланған.
Осы мақсатта мектеп жанынан 61 жазғы тынығу лагері ашылып, онда мыңдаған бала демалады. Сонымен қатар қала сыртындағы лагерьлерде, этно және шатыр лагерьлерде, спорттық және дебаттық алаңдарда, үйірмелер мен экскурсияларда балалардың жан-жақты дамуына жағдай жасалған.
Жазғы маусымның басталуына орай Қызылжарма ауылдық округіндегі №295 «Келешек мектебінде» «Жазғы Time» лагерінің салтанатты ашылу рәсімі өтті.
Лагерь аумағында оқушылардың шығармашылық және интеллектуалдық қабілеттерін дамытуға арналған түрлі үйірмелер мен арнайы алаңдар жұмыс істейді. Әсіресе ұлттық құндылықтарды дәріптеуге басымдық берілген. Мектеп ауласында арнайы тігілген киіз үйде домбыра үйірмесі ұйымдастырылып, балалар қазақтың қасиетті аспабында күй шертіп, ұлттық өнердің қыр-сырын меңгеруде. Бұл үйірмеге 50 бала қатысады.
Сонымен қатар «Шаңырақ» үйірмесіне 20 оқушы тартылса, робототехника бағыты бойынша 15 бала білімін жетілдіруде. Футбол секциясына 20 оқушы, ал шахмат үйірмесіне 15 оқушы қатысып, қабілетін шыңдап жатыр.
Өткен жылдың күзінде пайдалануға берілген заманауи мектепте бүгінде 832 оқушы білім алады. Мектеп директоры Ғазиз Төребаевтың айтуынша, жазғы лагерьге күн сайын 170-ке жуық бала келеді. Оның ішінде түрлі үйірмелерге қатысатын оқушылар да бар.
– Балалардың қауіпсіздігі мен жайлы демалысы үшін барлық жағдай жасалған. Оқушылар ыстық тамақпен қамтамасыз етіледі. Лагерь жұмысының басты мақсаты – балалардың бос уақытын тиімді ұйымдастырып қана қоймай, олардың шығармашылық, спорттық және интеллектуалдық дамуына мүмкіндік беру, – дейді мектеп директоры.
Ашылу салтанатында балалар өнер көрсетіп, түрлі ойындарға қатысты. Ата-аналар мен қонақтар лагерьдің материалдық-техникалық базасымен танысып, оқушылар үшін жасалған мүмкіндіктерге оң бағасын берді.
Жалпы, жазғы демалыс – балалардың жаңа достар тауып, білім мен тәжірибе жинақтайтын кезеңі. Ал «Жазғы Time» лагері осы міндетті абыроймен атқарып, жас ұрпақтың жарқын болашағына бағытталған игі жобалардың біріне айналып отыр.
Бағлан АМАНЖОЛ,
«Сыр бойы»
