Кеше облыс әкімдігінде облыс әкімінің орынбасары Евгений Кимнің төрағалығымен «Шалқия» кен орнындағы кезеңдік шаралар барысына арналған мәжіліс өтті.Онда негізінен қорғасын-мырыш қорын игеру мәселесі қаралды. Бұл аймақтың әлеуметтік-экономикалық дамуына орасан зор үлес қосатын маңызды әрі ірі инвестициялық жобалардың қатарынан саналады. Ал «Шалқия» – мырыш өндіру жөнінен республикадағы ғана емес, дүние жүзіндегі алып кешен. Қазір мұнда кен орнын игеру, тау-кен байыту жоспарын жетілдіру, зерттеу шаралары қолға алынды.
Мәжілісте «Тау-Кен Самұрық» АҚ басқарма төрағасы Қанат Құдайберген кен орны орналасқан Жаңақорған ауданында су құбырын жүргізу, электр және сумен жабдықтау жобаларының жүзеге асырылуы жөнінде айтып берді. Өндіріске қажетті инфрақұрылым тарту барысында кездесетін мәселелерге тоқталды. Оның ішінде «Шалқия» кентіндегі иесіз қалған көпқабатты үйлер мен электр желілерін қайта жаңғыртып, теңгерімге қабылдау қажеттілігі туындап отыр.
Облыс әкімінің орынбасары Евгений Ким жиын қорытындысында аймақ дамуы үшін аса маңызды жобаны жүзеге асыруға, түйткілдерді шешуге ықпал жасалатынын, бұған жергілікті биліктің де мүдделі екенін жеткізді. Сондай-ақ, кен орнының жұмысын ілгерілету бағытында тиісті орындарға біршама тапсырма жүктеді.
Н.ҚАЗЫБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
