Соңғы 5-6 жыл көлемінде әлеуметтік салада оның ішінде, денсаулық сақтау саласын дамытуда облыс әкімінің қолдауымен ауқымды жұмыстар атқарылып жатқаны белгілі. Осының негізінде Сыр елі республика көлеміндегі өзге аймақтар арасында әлеуметтік салаға ең көп қаржы жұмсап отырған бірден-бір облыс ретінде танылды. Бұл жөнінде облыс әкімі жуырда өткен есепті кездесуде де айтқан еді.
Сыр медицинасының заман талабына сай жарақтандырылуымен қатар, тұрғындарға сапалы қызмет көрсетуде мамандар біліктілігінің маңызы зор. Өйткені, білікті кадр – сапалы қызмет кепілі. Осы орайда кадрдың қадірін білген аймақ басшысы салада маман тапшылығын жою бағытында бірқатар тың бастамаларды көтеріп, өзге өңірлерге үлгі көрсетіп келеді.
Мәселен, 2016 жылдан бастап облыс әкімінің гранты негізінде еліміздің 5 жоғары оқу орнында 42 жас даярлана бастады. Олардың алғашқы легі биыл оқуын аяқтап, туған жерге келіп қызмет етуге әзір. Атап айтқанда, 2019 жылы – 16, 2020 жылы – 15, 2021 жылы – 10, 2022 жылы 1 дәрігер резидентураны бітіреді.
– Облыс әкімінің еңбегі ұшан-теңіз. Әсіресе, маман тапшылығын жою бағытындағы бастамалар оң нәтиже көрсетіп отыр. Республикада біздің өңірде ғана облыс әкімінің арнайы грантымен мамандарды резидентурада оқытудамыз. Бізге жетіспейтін мамандар негізінен, акушер-гинекологтар, неонатологтар, анестезиолог-реаниматологтар, фтизиатрлар, рентгенологтар, психиатрлар. Бұлардың бәрі – ең қиын, жауапкершілігі ең жоғары мамандықтар. Бұлар бізде ғана емес, бүкіл еліміз бойынша тапшы. Бұл ретте облыс басшысы мамандар тапшылығын жоюда үлкен әрі батыл қадамға барды. Біздің облыстың бұл бастамасын көрген өзге өңірлер резидентурада оқытуды енді қолға ала бастады,– дейді облыстық денсаулық сақтау басқармасының персоналды басқару және ұйымдастыру бөлімінің басшысы Зәуреш Сарыбаева. 
Тәжірибелі 30 дәрігерді даярлау үшін биыл тағы облыс әкімінің арнайы гранты бөлінді. Оған мектеп және медициналық колледж оқушылары арасынан үздіктер іріктеліп алынды.
– Облыс әкімінің арнайы грантымен оқуға түскен оқушылар жатақханамен қамтылған. Біз олардың жағдайын үнемі бақылап отырамыз. Бакалавр бойынша да бізден басқа ешқандай облыс маман даярлап жатқан жоқ. Сондықтан біз мұны мақтанышпен айта аламыз. Бакалавр бойынша оқып жатқан мамандар негізінен бастапқы медициналық көмек көрсету ұйымдарында жалпы тәжірибелік дәрігер, жалпы хирург болады. Осы қарқынмен біздің облыс екі жылда маман тапшылығын жояды деп ойлаймын,– деген Зәуреш Сағатқызы облыста былтыр тапшылық 205 дәрігерді құраса, биыл 137-ні көрсетіп отырғанын айтты.
Бөлім басшысының айтуынша, дәрігер жетіспеушілігі бүгінде бастапқы медициналық санитарлық көмек көрсету ұйымдарында сезіледі. Себебі, сол деңгейде көрсетілетін қызмет сапасын арттыру мақсатында аймаққа тіркелген халық санын 2200-ден 1800, 2020 жылға 1500-ге дейін жеткізу жұмыстары жүргізілуде. Осы орайда өткен жылы 23 қосымша аймақ ашылып, 1 аймаққа тіркелген халық саны 1689-ға жетті. Қосымша аймақтардың ашылуы өз кезегінде дәрігерлерді қажет етеді. Десе де, бұл да шешімін табуда.
– Әсіресе, ауылдық жерлерде маман тапшылығын түгел жойдық. Бүгінде аудандарда ваканция жоқ. Бұл да атқарылып жатқан ауқымды жұмыстардың нәтижесі. Мысалы, 2017-2018 жылдары 145 жас маман облыстың денсаулық сақтау саласына тартылып, оның 60 проценті бастапқы медициналық санитариялық көмек көрсету ұйымдарына жіберілді. Осылайша БМСКК ұйымдарының дәрігерлермен қамтылу көрсеткіші 95 процентке жеткізілді, – деді және сөзінде З.Сарыбаева.
Салада дәрігерлер тапшылығын жоюдың тағы бір әдісі – мамандардың біліктілігін көтеру, қайта даярлау. Бұл бағытта республикадағы жетекші медициналық оқу орындарымен меморандумдар жасалып, тығыз байланыс орнатылып келеді. Соның негізінде ақ халаттылардың білімін шыңдап, кәсібилігін арттыру үшін жергілікті бюджеттен қомақты қаражат бөлінуде. Мәселен, өткен жылы 767 маман білімін жетілдіріп, 720 дәрігер шеберлік дәрістеріне қатысып, құзыреттіліктері мен біліктіліктерін көтерген.
Алыс-жақын шет елдердің ірі клиникаларынан біліктілік курстарынан өтіп, көрген-білгендерін, көкейге түйгендерін қызмет барысында кәдеге асырып жүргендер де аз емес. Атап айтқанда, былтыр Корея мемлекетінде – 7, Қызылорда облысы мен Татарстан Республикасы арасындағы екіжақты қатынасты дамыту жөніндегі Жол картасы аясында 157 маман біліктіліктерін көтеріп қайтты.
Кореяда болып, біліктілігін жоғарылатқандардың бірі – Жанна Қалдыбаева. Ол облыстық перинаталды орталығы бас дәрігерінің неонаталогия ісі бойынша орынбасары. 2012 жылы Литваның Каунас қаласында тәжірибе жинақтаған Жаннаның Кореяда көрген-білгендері тіпті бөлек.
– Былтыр маусым айында облыс әкімінің қолдауымен Кореяның Сеул қаласындағы Северанс клиникасында екі апта тәжірибеден өтіп келдік. Ол клиникада шала туылған нәрестелердің әсіресе 1000 грамға дейінгі шақалақтардың тірі қалу көрсеткіші 95 процент екен. Бізде 65 процент. Сондықтан олардың нәрестелерді күту тәжірибесі бізге өте қызық болды. Ол клиникаға тек Сеулден емес, жан-жағындағы қалалардан да науқастар көптеп келеді. Біз барғанда 45 нәресте ем алып жатты. Олардың бәрі ауыр науқас. Клиника АҚШ-тың әдіс-тәсілдерін пайдаланады екен. Мамандары да сол жақтан оқып келеді. Екі аптада үйренгенім көп болды. Жұмыстардың бәрі жүйеленген. Жұмыс жүктемесі біздегідей көп емес. Әркім өзіне тиесілі ғана шаруасын істейді де, қалған уақытта ғылыми жұмыспен айналысады. Ал, материалдық базасына келсек, олардағы құрал-жабдықтар біздің орталықта да тұр. Яғни, оларда тұрған құрылғылар, түрлі қажетті қондырғылар бізде де бар. Осыны көргенде қатты қуандым. Біз де ешкімнен кем емеспіз деген мақтаныш сезімі кернеді бойымды. Екі аптада алған әсерімді сөзбен жеткізе алмаймын, – дейді.
Кореяда білімін жетілдіріп, тәжірибеден өткен маманның бірі – Қызылорда қалалық ауруханасы хирургия бөлімінің меңгерушісі, дәрігер-хирург, эндоскопист Бауыржан Жұмандықов.
– Ол жақта ота жасаудың тың тәсілдерін үйреніп, медицина саласының соңғы жетістіктерімен таныстым. Көңілге түйгеніміз көп болды. Медицина – күн сайын жаңарып отыратын сала. Сондықтан үнемі ізденіс, үздіксіз білім қажет. Ол үшін осындай шаралардың маңызы зор екені белгілі. Кореялық әріптестерімізден үйренгеніміз бүгінде кәдемізге жарап жатыр,– дейді ол.
Салаға маман тарту, дәрігерлердің біліктілігін арттыру жолындағы жұмыстар алдағы уақытта да жалғаса бермек. Өйткені, сапалы қызметтің басында білікті кадр тұратыны белгілі.
Айнұр БАТТАЛОВА.
Суреттерді түсірген
Нұрболат НҰРЖАУБАЙ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
