Қазір облыста эпидемиологиялық жағдай тұрақты. Соңғы тәулікте коронавирус инфекциясына байланысты жаңа жағдай тіркелген жоқ. Сондай-ақ, 136 мыңнан астам облыс тұрғыны ревакцинациядан өтті. Ал «Рfizer» вакцинасын 61988 адам қабылдады. Бұл туралы өңірлік коммуникациялар қызметінде өткен брифингте облыстық денсаулық сақтау басқармасы басшысының орынбасары Жангелді Шаймбетов хабарлады.
– Аймақта эпидемиологиялық ахуал жақсарып келеді. Бүгінгі таңда инфекциялық стационарда 25 азамат, ал жансақтау бөлімінде 9 науқас емделуде. Сонымен қатар, вакцинаның І компонентін алғандар 94 процентті, ІІ компонентімен 92 процент қамтылды. «Pfizer» екпесін салдырғандар 63 процентті құрады. Облыстағы барлық емханаларда ревакцинация жұмыстары жүйелі түрде жүргізілуде, – деді ол.
Соңғы уақытта аурушаңдық көрсеткіші 7 есеге төмендеген. Бүгінде облыстағы белсенді ошақтар саны – 51, ал ұжымдық ошақ саны – 10-ды құрады.
– Қазіргі таңда облыс тұрғындары індетке қарсы вакцинаны жүкті әйелдер және жасөспірімдер белсенді түрде салдыруда. Коронавируспен ауырған азамат 6 ай мерзімнен кейін ревакцинациядан өтуіне болады. Сонымен қатар, екпемен қамтылғандар арасында медицина қызметкерлері, мұғалімдер және күш құрылымдары көш бастап тұр. Облыс бойынша індетке қарсы иммундау науқанына 106 екпе кабинеті қамтылған. Қазір тұрғындарды вакцинациялау науқаны «Qazvac», «Sinovac», «Pfizer» екпелерімен жүргізілуде, – деді облыстық санитарлық-эпидемиологиялық бақылау департаментінің бөлім басшысы Әлия Ыдырысова.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
