Бүгінде өлшеу құралдарынсыз жұмыс жүргізуді елестету қиын. Олар барлық саланы дерлік қамтиды. Атап айтқанда, түрлі қызмет көрсету орындарында, денсаулық сақтау, ғылыми зерттеуде, азық-түлік өндірісімен қатар көлік қауіпсіздігін қамтамасыз ету және спорттық рекордтарды тіркеуде де қолданылуда.
Өлшеу құралдарының барлығы да белгіленген стандардтық көрсеткішке сәйкес жұмыс істеуі тиіс. Ол сақталмаған жағдайда зияны мен зардаптары туралы айтып жатудың өзі артық. Сондықтан құралдар талапқа сай белгілі бір уақытта тексеруден өтіп тұруы міндеттелген. Бұл заңдылықтардың орындалуын қадағалайтын арнайы құрылымдар жұмыс істейді.
Өңірімізде осындай міндет Сауда және интеграция министрлігі Техникалық реттеу және метрология комитетінің облыс бойынша департаментіне жүктелген. Аталған департамент басшысының міндетін атқарушы Әуелбек Қамзаевпен әңгімелесу барысында департамент мамандары бірінші жартыжылдықта бекітілген тізімге сәйкес 5 профилактикалық бақылау жүргізгенінен хабардар болдық. Сонымен қатар, тексерулер барысында да заңбұзушылықтар анықталғанын білдік.
Алғашқы тексеру №2 Қызылорда арнаулы әлеуметтік қызметтер көрсету орталығында жүргізіліп, онда «Өлшем бірлігін қамтамасыз ету туралы» Заңның 19-бабының талаптары бұзылғаны анықталған. Атап айтқанда, қолданыстағы 94 дана өлшем құралының ішінен 13 данасы салыстырмалы тексеруден өткізілмей, пайдаланылған. Оның ішінде қан қысымын өлшеуге арналған 1 манометр, 5 дана қызу өлшеуге арналған термометр, 1 дана автоклав, сынақ жүргізуде залалсыздандыруға арналған 1 автоклав, сынақ жүргізуде үлгілерді және саймандарды кептіруге арналған 6 кептіргіш шкаф болған.
Ал қолданыстағы өлшем құралдарын талапқа сай, уақытылы тексеруден өткізбей пайдаланса, құралдар теріс көрсеткіштер көрсетуі мүмкін. Қорытындысында адам өмірі мен денсаулығына кері әсерін тигізеді, зиян келеді. Қауіп туындайды. Тексеру жүргізген мамандар заң бұзушылықты жою жөнінде нұсқама берді.
№6 қалалық емханада болған тексерісте қолданыстағы 518 дана өлшем құралының 5 данасы салыстырмалы тексеруден өткізілмей, пайдаланылғаны анықталды. Оның барлығы – аурулардың қан қысымын өлшеуге арналған сфигманометр-тонометр. Келесі кезектегі тексеру Қармақшы аудандық ауруханасында жүргізіліп, мұнда қолданыстағы 110 дана өлшем құралының ішінен салыстырмалы тексеруден өтпегені 6 дана сфигманометр-тонометр және 4 дана манометр екені белгілі болды. Соған сәйкес нұсқама беріліп, заңбұзушылықтар жойылды.
Жергілікті техникалық реттеу және метрология саласы мамандары тек әлеуметтік нысандарды ғана тексерумен шектелмей, өндіріс орындарын да назардан тыс қалдырмайды. Олар «Торғай-Петролеум» АҚ-ға қарасты нысандарға тексеру жүргізіп, бұл жерде де заңның 19-бабының талаптары бұзылғанын тіркеді. Атап айтқанда, қолданыстағы 381 дана өлшем құралының 8-і салыстырмалы тексеруден өткізілмей, пайдаланылған. Олар – мұнай құрылғыларындағы қысымды өлшеуге арналған 7 манометр мен мұнай температурасын өлшейтін 1 термометр.
«Дос Инжиниринг ЛТД» ЖШС-да қолданыстағы 85 дана өлшем құралының бесеуі, яғни мұнай құрылғыларындағы қысымды өлшеуге арналған манометрлер салыстырмалы тексеруден өткізілмей, пайдаланылып келген. Департамент тарапынан аталған өндіріс орындарына нұсқама беріліп, заң бұзушылықтар жойылды.
Ә.Қамзаев сонымен қатар, департамент мамандары басқа да органдармен бірлескен тексерулер жүргізілгенін айтты. Сондай тексерулер нәтижесімен облыстық кәмелетке толмағандарды бейімдеу орталығында қолданыстағы 16 дана өлшем құралының ішінен 6 термометр, 1 сфигманометр және 1 бой өлшегіш салыстырмалы тексеруден өткізілмей пайдаланылғандығы анықталды. Облыстық прокуратураның берген ұсынысы қаралып, заң бұзушылыққа жол берген адамға 43800 теңге көлемінде айыппұл салынды. Пайдалануға жарамсыз өлшем құралдарын салыстырмалы тексеруден өткізу жөнінде нұсқама берілді.
Департамент өкілінің айтуынша, облыстық санитариялық-эпидемиологиялық бақылау департаментінен өнім қауіпсіздігінің мониторингі нәтижесінде анықталған «Зерновая долина» ЖШС өндірген «Кеспе лапша» өнімінің Кеден одағы 022/2011 «Тамақ өнімдерін таңбалау бөлігі» техникалық регламенттеріне сәйкес еместігі жөнінде зерттеп, қарауға материалдар түскен. Материал зерттеліп, осы өнімнің таңбалануында кедендік одаққа мүше мемлекеттердің арасында жүруге бірыңғай белгісі болмағаны анықталды. «Әкімшілік құқық бұзушылық туралы» кодекстің 415-бабы 1-бөліміне сәйкес заңды тұлғаға 284408 теңге көлемінде айыппұл салынды. Серіктестік басшылығына техникалық регламенттің таңбалау талаптары бойынша сәйкес емес өнімдерді айналымнан алу туралы түсіндірілді.
Бұл тексерулердің барлығы да тұтынушының, яғни баршамыздың мүддеміз үшін жұмыс істейді. Жұмыс жалғасын тауып, Техникалық реттеу және метрология комитетінің облыстық департаменті мамандары адам өмірі мен денсаулығына кері әсерін тигізер заңсыздықтардың жолын кесе бермек.
Ыдырыс ТӘЖІҰЛЫ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
