Облыс әкімі Нұрлыбек Нәлібаев, құқық қорғау органдарының бірінші басшылары, мәслихат депутаттары, зиялы қауым өкілдері, ел ағаларының қатысуымен Президент саябағының аумағында жаңа драма театрдың іргетасы қаланып, капсуласын салу рәсімі өтті.
Аймақ басшысы жиналған жұртшылықты жаңа нысан құрылысының басталуымен құттықтады.
– Мемлекет басшысы қаламызда өткен Ұлттық құрылтайдың қорытынды отырысында «Жалпы «Сыр елі – жыр елі» деп бекер айтылмайды. Қорқыт ата заманынан жалғасып келе жатқан жыраулық-жыршылық және күйшілік өнер бұл аймақта кең қанат жайған» деп атап өтіп, Қызылордадағы жаңа драма театр құрылысы биыл басталатынына тоқталған еді. Театр ұлтымыздың болмыс-бітімін сақтауға, руханиятты байытуға зор үлес қосып келеді. Жетпіс жылдан астам тарихы бар, қазақ театр өркениетінің қарашаңырағы Нартай Бекежанов атындағы облыстық қазақ музыкалық драма театры – Сыр өңірінің мәдени өмірінің ажырамас бөлігі. Бүгінде репертуарында 60-тан астам қойылым бар. Шығармашылық ұжым жыл сайын 70 мыңнан астам көрерменге рухани азық сыйлайды. Президент саябағы аумағында іргетасы қаланатын жаңа театр – төл өнерімізді түлететін, жас буынның шығармашылық әлеуетін шыңдайтын, ұлттың жаны сөйлейтін киелі мекен болады деп сенеміз, – деді Нұрлыбек Нәлібаев.
Жаңа өнер ордасы 2,5 гектар жерге орналасады, ал құрылыс аумағы 4026,80 шаршы метр. Онда 520 көрермен театр қойылымын тамашалай алады. Репетициялық залдар, оркестр шұңқыры, холл, киім сақтау және ауыстыру, актерлік грим бөлмелері, студиялық және шығармашылық алаңдар, әкімшілік кабинеттер қарастырылған.
Қазақтың ұлттық кәсіби театрының шымылдығы түрілген Қызылордада бір ғасырдан соң жаңа ғимараттың іргетасы қалануының өзіндік мәні бар. Қызылорда – қазақ театр өнерінің негізі қаланған жер. Бір ғасыр бұрын жаңадан құрылған ұлттық театрдың алғашқы қойылымы осында сахналанған. Сыр жұртшылығы халқымыздың асыл мұраттарын, құндылықтарын сахна арқылы ұрпақ санасына сіңіріп келген ұлт театрының Қызылордадан бастау алғанын мақтаныш тұтады.
Салтанатты шарада сөз алған Қазақстанның еңбек сіңірген қайраткері Хұсейін Әмір-Темір өңірде жаңа өнер ордасының іргетасы қалануы ерекше оқиға екенін атап өтті.
– Сыр халқы үшін ерекше сәт деп ойлаймын. Ұзақ жылдан бері елге қалтқысыз қызмет етіп келе жатқан облыстық театрдың жаңа ғимаратының іргетасы құйылады. Ұлт руханиятына өлшеусіз үлес қосқан өнер ордасының жаңа ғимараты алдағы уақытта заманауи, сәулетті үлгіде ел игілігіне айналады. Бұл қуанышты хабарды біздің ұжым мен көрермен зор ризашылықпен және қуанышпен қабыл алды. Сондықтан бүгінгі рәсімді барша облыс жұртшылығы үшін мәртебелі оқиға деп бағалаймын. Жаңа нысанда жаңа серпін, жаңа шабыт, жаңа өнер шығармалары дүниеге келеді деген сенімдемін, – деді ол.
Сондай-ақ «ВД Строй Инжиниринг» ЖШС бас директоры Азамат Өсімбеков өз сөзінде ғимарат алдағы екі жылдың ішінде ел игілігіне берілетінін жеткізді.
Айта кету керек, 2022 жылдан бері өңірде 22 мәдениет нысаны жаңадан салынған. Барлық ауданда «Руханият орталықтары» ашылды. Облыстың бас шаһарында «Өнер орталығы», «Анаға тағзым», «Отбасы орталығы», «Оқушылар сарайы» бой көтерді.
Былтыр Қызылорданың астана болғанына 100 жыл толуына орай облыстық тарихи-өлкетану музейінің, Ассамблеяның 30 жылдығына орай «Қазатомөнеркәсіп» компаниясының қолдауымен «Достық үйінің» жаңа ғимараты салынды. Кейінгі жылдары «Сыр жұлдыздары» академиясы, Жалағаш, Жаңақорған, Шиелі аудандарында «Өнер мектебі» мен «Оқушылар үйі» іске қосылды.
Алдағы күндері тәулік бойы жұмыс істейтін Президенттік кітапхана құрылысы басталады.
Әділжан ҮМБЕТ,
«Сыр бойы»
