Су шаруашылығы қызметкерлері күніне орай «Нұра» топтық су құбыры республикалық кәсіпорнының «Арал» салынып жатқан кәсіпорындарының бірлескен дирекциясы филиалында салтанатты жиын өтті.
Кәсіби мерекеге орай өткен жиында филиал директоры Алтынбек Есенов сала қызметкерлері мен ардагерлерін құттықтады.
– Өзінің білімі мен тәжірибесін, кәсібіне деген құрметті ұрпақтан ұрпаққа жеткізіп келе жатқан су шаруашылығы қызметкерлерін мерекемен құттықтаймын. Сала ардагерлері мен мамандарға адал еңбектері үшін ризашылық білдіргім келеді. Өңірде су шаруашылығын дамытуға баса назар аударылып, маңызды міндеттер іске асырылуда. Барша сала қызметкерлеріне зор денсаулық, шаңырақтарына береке, жұмыстарына табыс тілеймін, – деді А.Есенов.
Сыр жұртшылығының негізгі тіршілік көзі – Сырдария суы десек, бүгінде іргелі кәсіпорын аймаққа қарасты 187 елді мекен, 405 мыңнан астам халықты үздіксіз сапалы ауызсумен қамтамасыз етіп келеді.
Аймақта Қазалы, Қармақшы, Жалағаш, Сырдария, Шиелі, Жаңақорған аудандарындағы және Қызылорда қаласындағы оқшау су жүйелері арқылы 88 елді мекен ауызсумен қамтылған. Оқшау су жүйелеріне қосылған тұтынушыларға жылдық таратылған ауызсу көлемі – 4841,2 мың текше метр. Сондай-ақ, «Арал-Сарыбұлақ», «Октябрь», «Жиделі» топтық су құбырларына 99 елді мекен қосылған. Олардағы ауызсу тұтынушыларына жылдық таратылған ауызсу көлемі 9 862,9 мың текше метрді құрайды.
Осылайша тұрғындарды ауызсумен қамту Сыр бойындағы шешімін тапқан басты мәселелердің қатарында тұр. Орталықтар мен шалғайдағы елді мекен тұрғындары да судан зәрулік көріп отырған жоқ. Жыл басында берген есебінде аймақ басшысы Гүлшара Әбдіқалықова өңір тұрғындарының 97 проценті орталықтандырылған ауыз су желісіне қосылғанын атап өткен еді. Филиал директоры облыста қалыптасқан қиын жағдайда салаға айрықша жауапкершілік артылғанын атап өтті.
– Халқымыз «Өмірдің денесі – жер, қаны – су, жаны – еңбек» дейді. Шындығында, өмірдің қантамыры – су жолдарын ақаусыз жұмыс істетіп, бүкіл жаратылыс әлеміне жан бітіретіндей етіп, су мен жерге еңбек еткенде ғана ел мен жер байлығы молаяды. Сондықтан су мен жердің тиімділігін арттыру арқылы ел байлығын молайту – парызымыз, – деді ол.
Жиында су шаруашылығы саласының ардагерлері марапатталды. Атап айтқанда, сала ардагерлері Сара Кәрібаева мен Шыңғыс Мамбетжанов ҚР Экология, геология және табиғи ресурстар министрлігінің «Су шаруашылығының ардагері» төсбелгісін иеленді. Сонымен қатар, Нұрбек Аймағамбет пен Марат Наурызбаев III дәрежелі «Еңбек даңқы» төсбелгісімен марапатталды. «Қызылорда қаласының оқшау сумен жабдықтау жүйелерін пайдаланушы» өндірістік бөлімшесінің шеберлері Абай Ибадуллаев, Айғабыл Орынбаев, Самигулла Малиев және Бақыт Дихамбаевқа «Су шаруашылығының үздігі» төсбелгісі табысталды.
Мұнан бөлек, «Арал» СЖКБД филиалының бірқатар өндірістік бөлімше қызметкерлері ҚР Экология, геология және табиғи ресурстар министрлігінің, «Қазсушар» РМК бас директорының «Құрмет грамоталарымен», Су ресурстары комитеті төрағасының «Алғыс хаттарымен», Ауыл шаруашылығы қызметкерлерінің салалық кәсіподағының, «Қазақстан су шаруашылығы» республикалық мемлекеттік кәсіпорны қызметкерлерінің жергілікті кәсіптік одағының «Құрмет грамоталарымен» марапатталды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
