Кеше облыс әкімі Гүлшара Әбдіқалықованың төрағалығымен жол желісін дамыту және жолаушылар тасымалы бойынша атқарылып жатқан жұмыстарға қатысты жиын өтті. Онда облыстық жолаушылар көлігі және автомобиль жолдары басқармасының басшысы Мұрат Тілеуімбетов биылғы жылдың І жартыжылдығында атқарылған жұмыстар мен алдағы жоспарлар туралы баяндады.
Облыс аумағында автомобиль жолдарының жалпы ұзындығы 3397 шақырымды құрайды. Оның 1016 шақырымы – республикалық, 2381 шақырымы облыстық және аудандық маңызы бар автомобиль жолдары.
Биыл республикалық және облыстық бюджеттен барлығы 20 млрд теңге көлемінде қаражат бөлініп, ұзындығы 360 шақырымды құрайтын автомобиль жолдары мен көпір өткелдері және көшелер жөндеуден өткізілуде. Республикалық бюджеттен төрт мемлекеттік бағдарлама арқылы 10,8 млрд теңге көлемінде инвестиция тартылды. Жартыжылдықта жоспарланған 6,6 млрд теңге 100% игеріліп, 50 шақырымнан астам автомобиль жолы жөндеуден өткізілді. Нәтижесінде жыл қорытындысымен облыстық және аудандық маңызы бар автомобиль жолдарының жақсы және қанағаттанарлық индикаторлық көрсеткішінің үлесі жоспарлы 75% құрады.
Атап айтсақ, «Нұрлы жол» бағдарламасы аясында жалпы 11 647 млн теңгеге 45 жоба жүзеге асырылып, ұзындығы 250 шақырымды құрайтын облыстық және аудандық маңызы бар автомобиль жолдары жөндеуден өткізілуде. «Өңірлерді дамыту» бағдарламасы аясында республикалық бюджеттен 1774,3 млн теңгеге Қызылорда қаласындағыСырдария өзенінің сол жағалауын дамыту мақсатында үш жоба жүзеге асырылуда. «Ауыл ел – бесігі» бағдарламасы бойынша республикалық бюджеттен 2604,6 млн теңге бөлініп, елді мекендердің 64 көшесіне орташа жөндеу жұмыстары жүргізілуде. Ал, «Кіші қалаларды дамыту» бағдарламасы аясында 1859,6 млн теңге бөлініп, Арал қаласының ұзындығы 8,8 шақырым 8 көшесін салуға және қайта жаңғыртуға, Қазалы қаласының ұзындығы 8,2 шақырым 10 көшесін қайта жаңғыртуға жұмыс жасалуда.
Қазалы ауданы «Қарлан» учаскесіндегі Сырдария өзені арқылы өтетін көпір жобасының мемсараптама қорытындысы алынды. Жобаның жалпы сметалық құны 4,4 млрд теңгені құрады. Оны Ұлттық экономика министрлігі арқылы 90/10 процентпен қаржыландыру мақсатында бюджеттік ұсыным әзірленуде.
Облыс тұрғындары үшін маңызды жобалардың бірі – «Қызылорда-Жалағаш» автомобиль жолы. Биыл республикалық бюджеттен 1 млрд теңге көлемінде қаражат бөлініп, мемлекеттік сатып алу конкурсы аяқталуда. Жөндеу жұмыстары шілде айының соңына қарай басталады.
Қазалы қаласы мен Әйтеке би кенті аралығын жаңарту жобасындағы 3 көпірді толықтай кеңейту жұмыстары атқарылды. Қазір жол жабынын кеңейту және су құбыры мен газ жүйесін қайта орналастыру жұмыстары жүргізілуде.
Жергілікті маңызы бар жол бойындағы көпірлердің техникалық жағдайы алаңдатып отыр. Қазір апаттық жағдайдағы 5 көпір өткелі мемсараптамадан өткізілуде. Қорытындысы тамыз айында белгілі болады. Басқарма басшысы Шиелі ауданындағы апаттық жағдайдағы 2 көпірдің құрылысын биылдан қалдырмай бастау қажеттігі туындап отырғанын айтты. Осындай жұмыстар аудандық әкімдіктерде де жүргізілуде. Қазалы ауданы 3 көпірдің, Арал, Жалағаш аудандары теміржол үстінен өтетін автокөлік жолының және Жаңақорған ауданы 3 көпірдің жобасын әзірлеуде.
Сондай-ақ облыс көлемінде 6 қалқымалы қайық өткелі бар. Бұл қайықтардың да техникалық жағдайы бақылауда. Арал ауданының Хан учаскесіндегі Сырдария өзеніне салынған қалқымалы қайық өткеліне күрделі жөндеу жүргізуге ЖСҚ әзірленген. Құны – 357,4 млн теңге.
Жиында «Қорқыт ата» әуежайы терминалын қайта жаңғырту және кеңейту жобалары, облыс аумағындағы темір жол вокзалдарының жай-күйі сөз болды. Облыс әкімі мемлекеттік бағдарламалар арқылы бөлінген қаржының уақытылы игеріліп, мақсатты жұмсалып, жөндеу жұмыстарының сапалы болуын тапсырды. Сонымен қатар, көлік айналымы қызметін бақылауға алуды жүктеді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
