Ақпанның 27-сі күні өткен «Нұр Отан» партиясының съезінде Елбасы аз қамтылған және көпбалалы отбасыларға атаулы әлеуметтік көмек көрсетудің жаңа тәртібі жайында елеулі мемлекеттік бастамалар ұсынды. Содан бері әлеуметтік көмекке қатысты сауалдардың легі толастамай тұр. Облыстық жұмыспен қамтуды үйлестіру және әлеуметтік бағдарламалар басқармасының мәліметіне қарағанда, біздің өңірімізде 35 мыңнан астам көпбалалы ана бар. Кәмелетке толмаған 4 және одан көп баласы бар отбасылардың саны 18,5 мыңнан асады.
Қазіргі кезде аудандар мен Қызылорда қаласында құрылған арнайы комиссиялар аулаларды аралап, көпбалалы, аз қамтылған отбасылардың жағдайымен танысып, оларға ең бірінші кезекте қандай көмек қажет екенін анықтады. Бүгінгі күнге 2356 отбасының, тұрмыстық жағдайы зерттеліп, әлеуметтік картасы жасақталуда. Ол әрбірінің қажеттілігін, әлеуметтік-тұрмыстық жағдайын бағалауды көздейді.
Жаңа бастамалар ең алдымен халықтың әл-ауқатын жақсартуға тиімді ықпал етеді. Біріншіден, 2019 жылдың 1 сәуірінен бастап атаулы әлеуметтік көмек көрсету критерийі ең төменгі күнкөріс деңгейінің 50 процентінен 70 процентке дейін көтеріледі.
Екіншіден, атаулы әлеуметтік көмек тағайындаған кезде отбасының жиынтық табысынан көпбалалы отбасыларға және «Күміс алқа», «Алтын алқа» төсбелгілерімен марапатталған көпбалалы аналарға төленетін мемлекеттік жәрдемақылар, сондай-ақ, балаларға арналған мүгедектігі бойынша жәрдемақылар, стипендия алып тасталады. Аз қамтылған отбасы балаларына (18 жасқа дейін, оқыған жағдайда 23 жасқа дейін) ай сайын 20 789 теңге кепілдендірілген көмек төленетін болады.
Үшіншіден, сұратылатын құжаттарды оңтайландыру арқылы атаулы әлеуметтік көмек тағайындау рәсімі жеңілдетіледі. Осылайша, ақпараттық жүйелерде мәліметтер (туу туралы куәлік, жеке куәлігі, т.б.) болмаған жағдайда халықты жұмыспен қамту орталықтары немесе ауылдық округтердің және кенттердің әкімдері тиісті мемлекеттік органдардан қажетті құжаттарды сұратады. Бұл үшін Е-халық ақпарат жүйесі пайдаланылатын болады.
Елбасы, сондай-ақ, мүгедек бала тәрбиелеп отырған ата-аналарға қамқоршылар мен отбасыларға жәрдемақыны 30 процентке көтеруді тапсырды. Нәтижесінде, облыс бойынша атаулы әлеуметтік көмекпен қамтылатын адамдардың саны 2 есеге дейін көбеймек. Биылдан бастап 5529 мүгедек бала тәрбиелеп отырған жәрдемақы алушылардың жәрдемақы мөлшері 31183 теңгеден 40538 теңгеге арттырылады. Ол үшін қосымша құжат рәсімдеу қажет емес.
Сонымен қатар, көмекке мұқтаж көпбалалы, аз қамтылған отбасыларын әлеуметтік қолдау мақсатында 21 ақпаннан бүгінгі күнге дейін аудан және қала әкімдерінің ұйымдастыруымен қайырымдылық акциялары өткізіліп отыр. Акция барысында 2400-ден астам отбасына 50,1 млн теңгеге қайырымдылық көмектері көрсетілді. Наурыздың 4-нен бастап жергілікті өкілетті орган өкілдері облыстық басқармалар, аумақтық департаменттер мен инспекциялар қайырымдылық акцияларды жалғастыруда. Акция 22 наурызға дейін жалғасады.
Облыс әкімінің тапсырмасына сәйкес көпбалалы және аз қамтылған отбасыларға республикалық және жергілікті бюджет есебінен қосымша қолдау шараларын көрсету үшін 2019-2021 жылдарға арналған өңірлік әлеуметтік Жол картасының жобасы әзірленді. Жол картасына қосымша әлеуметтік қолдаулар, мектеп жасындағы балалардың қоғамдық көліктерде жеңілдікпен жүруі, ыстық тамақпен және киім-кешекпен қамтылуы, мектеп жасына дейінгі балалардың балабақшамен қамтылуын субсидиялау, дәрі-дәрмекпен және тұрғын үймен қамтылу мәселелері енгізілді.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
