Күні кеше Мемлекет басшысы Қасым-Жомарт Тоқаевтың Жарлығымен Нұрлыбек Машбекұлы Нәлібаев Қазақстан Республикасы Премьер-министрінің бірінші орынбасары қызметіне тағайындалды. Төрт жылдан астам уақытта Нұрлыбек Машбекұлының басшылығымен облыста үлкен өзгерістер жасалды. Өңірдің әлеуметтік-экономикалық дамуы жаңа деңгейге көтеріліп, жарқын жетістіктер республикаға үлгі ретінде ұсынылды.
Сыр елі – Президенттің ерекше қамқорлығы мен қолдауына ие аймақ. Мемлекет басшысы аталған төрт жылдың ішінде өңірге үш мәрте жұмыс сапарымен келді. Биыл жыл басында Құрылтайдың қорытынды жиыны Қызылордада өтті.
«Сыр бойы – нағыз еңбек адамдарының мекені. Кеңес заманында осы аймақтан 100-ге жуық Еңбек Ері шыққан. Әйгілі күрішші Ыбырай Жақаевты халқымыз ерен еңбектің символына балайды. Аға буынның абыройлы жолын бүгінгі ұрпақ лайықты жалғастырып келеді», – деген Мемлекет басшысы облыста қарқынды даму барын, бұл Нұрлыбек Нәлібаевтың белсенді, табанды жұмысының нәтижесі екенін айрықша атап өткен болатын.
Бір ғана мысал, облыс бюджетінің көлемі 2022 жылдың 1 сәуірінде 391,4 млрд теңгені құраса, 2026 жылдың сәйкес кезеңінде 728,2 млрд теңге болды. Даму бюджетінің көлемі 2022 жылдың 1 сәуірінде 27,5 млрд теңге болса, 2026 жылдың сәйкес кезеңінде 79,6 млрд теңгені құрады.
Редакциямызға Нұрлыбек Машбекұлының аймақтағы қызметі мен әрбір саладағы жетістіктер бойынша қоғам қайраткерлері және зиялы қауым өкілдерінен хаттар келіп түсуде. Біз солардың бірқатарын және төрт жылдың өзегінде атқарылған істердің бір парасын оқырманға ұсынуды жөн санадық.
