Биыл Сыр елінің аяулы перзенті, ауыл шаруашылығын дамытушылардың бірі, Социалистік Еңбек Ері, Ұлы Отан соғысының ардагері Алдаберген Бисеновтің туғанына 100 жыл толды.
Ол екінші дүниежүзілік соғыстан І-ІІ дәрежелі «Отан соғысы» орденінің иегері болып елге оралған соң Тереңөзек аудандық байланыс жүйесінде еңбек жолын бастап, одан кейін Қызылорда ауыл шаруашылығы техникумын бітірген. Жалағаш ауданы «Мәдениет» ауылындағы МТС-та бөлімше механигі, «Еңбек» ұжымшарының бас инженері қызметтерін атқарды.
Іскер ұйымдастырушы Алдаберген Бисенов 1962-1972 жылдары «Жаңаталап» кеңшарында он жыл директор болып қызмет атқарған кезінде күріш егісінің көлемін 2 мың гектарға дейін жеткізіп, әр гектардан 50 центнердің үстінде өнім алынған екен. Осылайша 1971 жылы сегізінші бесжылдықтың қорытындысымен Социалистік жарыста үздік атанып, Одақ көлеміндегі ауыспалы «Қызыл Туды» жеңіп алды. Бұл еңбегі үшін совхоз директоры Алдаберген Бисеновке Социалистік Еңбек Ері атағы беріліп, кеудесіне алтын жұлдыз тақты.
Ауыл шаруашылығы саласында абыройы өрлеп, атағы елге танылған Алдаберген аға осы жылдар ішінде Қазақ ауыл шаруашылығы институтын, сонымен бірге, кеңшар директорларын даярлайтын бір жылдық курсты оқып бітірген болатын. Енді ол кісіге қалаға жақын орналасқан «Қазақстанның 50 жылдығы» шаруашылығы, қазіргі Нағи Ілиясов ауылының тізгіні тапсырылды. Деректерге сүйенсек, Алдаберген Бисенов бұл ауылды он алты жыл (1972-1988) басқарыпты. Осы уақытта ауылдың егін және мал шаруашылығын өркендетумен бірге, қарқынды құрылыстар салынып, өндіріс нысандары ашылып, халықтың тұрмыстық әлеуеті көтерілген екен. Сондай-ақ қала тәртібімен көшелер салынып, оны жағалай ағаш отырғызылып, көше бойына жарық жүргізілген, қазіргіше айтсақ, ауылдың көркейіп, абаттанған кезі де осы еді.
Иә, кезінде Социалистік Еңбек Ері Алдаберген Бисенов басқарып, берекелі тұрмыс-тіршіліктің негізін қалаған ауылға бүгінде Қазақстанның Еңбек Ері Абзал Ералиев басшылық етіп отыр. Бұл да тарихы мен тамыры жалғасқан ұрпақтар сабақтастығының айқын бір көрінісі болар.
«Елу жылда ел жаңа» дейді халқымыз. Айтса, айтқандай, осыдан жарты ғасыр бұрын өрлеу-өркендеу жолына түскен ауыл бүгінде тұрмыс-тіршілігі таңғажайып өзгерген, еліміздегі ең көрікті елді мекенге айналған.
Айта кетейік, сол кеңестік өкімет тұсында КСРО көрмесінің алтын және күміс медальдарын иеленген, Қазақстанның Алтын кітабына аты жазылған Социалистік Еңбек Ері Алдаберген Бисеновтің есімі өзі туып-өскен Аққұм ауылындағы орта мектепке берілді, ауылға ескерткіші қойылды. Сонымен қатар, Жалағаш, Тереңөзек кентінде, Н.Ілиясов ауылында А.Бисенов атындағы көшелер бар.
Социалистік Еңбек Ері Алдаберген Бисеновтің туғанына 100 жыл толуына орай Ә.Тәжібаев атындағы облыстық әмбебап ғылыми кітапханасында мемлекет және қоғам қайраткерлері, зиялы қауым, ардагерлер, ғалымдар және жастар қатысқан «Тұғыры биік тау тұлға» атты еске алу кеші өтті. Рухани-танымдық іс-шараны Қорқыт ата атындағы Қызылорда университетінің профессоры Ғабит Тұяқбаев жүргізді.
Алдымен Еңбек Ерінің өмірі мен қызмет жолына арналған телехабардан үзінді көрсетіліп, қайраткердің көзін көрген, қатар жүріп еңбек еткен ардагерлердің айтқан естеліктері назарға ұсынылды. Сондай-ақ «Еңбекпен өрілген ғұмыр» атты кітап көрмесі және фотосурет галереясы ұйымдастырылды.
Кеш меймандары, қоғам қайраткері, «Құрмет» орденінің иегері, облыстық ардагерлер кеңесінің төрағасы Серік Дүйсенбаев, Қазақстанның Еңбек Ері Имамзада Шағыртаев, мемлекет және қоғам қайраткерлері Бекмырза Еламанов, Әріп Хожбанов, Шакизат Төребаев, ауыл шаруашылығы, жер қатынастары басқармасы ардагерлер кеңесінің төрағасы Нұрлыбай Ұлықпанов, ардагер-журналист Еркін Әбілов сөз алып, ауыл шаруашылығының көрнекті ұйымдастырушысы, алтын жұлдызды Алдаберген Бисеновтің адами қадір-қасиеті, биік парасаты, елге сіңірген еселі еңбегі, бір сөзбен айтқанда, ғибратқа толы ғұмыр жолы туралы ой-пікірлер мен естеліктер айтты.
Еңбек Ерінің ұрпақтары атынан «Ақжарма» ауылының директоры, Сырдария аудандық мәслихатының депутаты Марат Бисенов, Қызылорда көпсалалы жоғары колледжінің директоры Маржан Бисенова сөйлеп, кешке келушілерге алғыс білдірді. Сондай-ақ шөбересі Айымхан Хамза атасына арнаған алғысын жыр шумақтарымен жеткізді. Әрі қарай кеш кейіпкеріне арналған өлеңдер оқылып, ән-жырмен жалғасты.
Ақ адал еңбегімен дараланған,
Салмағы сом алтынмен бағаланған.
Ұлтыңның ұлағатты перзенті едің,
Ұрпағың әр ісіңнен сабақ алған, – деп ақындар жырлағандай, тұғыры биік тау тұлға Алдаберген Бисенов есімі жылдар өткен сайын жаңғырып, жас ұрпақ алдында дәріптеле береді.
Ғазиза ӘБІЛДА,
«Сыр бойы»
