«Шын мәнінде, отансүйгіштік – құрғақ ұран мен бос сөз емес. Отансүйгіштік – туған елге, атамекенге деген сүйіспеншілік. Ол ең алдымен туған жердің табиғатын, тарихы мен мәдениетін, әдет-ғұрпын терең білуден басталады», деген болатын Мемлекет басшысы Қасым-Жомарт Тоқаев.
Мемлекет басшысы атап өткендей, шынайы патриотизм құр сөзден емес, туған өлкеңді, оның табиғи байлығы мен географиялық ерекшелігін терең түсінуден бастау алады. Осы орайда, ҚР Оқу-ағарту министрлігі тарапынан биыл қабылданған шешімдер мектептегі білім сапасын арттырудағы елеулі бетбұрыс болды. Әсіресе, 8 және 9-сыныптарда «Қазақстан географиясы» курсын толыққанды меңгеру үшін аптасына 2 сағат бөлініп, барлық қажетті жағдайдың жасалуы – оқу бағдарламасын тереңдетіп оқытуға жол ашқан стратегиялық қадам.
Бұл – сағат санын ғана көбейту емес, өсіп келе жатқан жас ұрпақтың бойына ұлттық сана-сезім, отансүйгіштік пен экологиялық жауапкершілікті дарытудың нақты құралы. Мен пән мұғалімі ретінде бұл жаңашылдықты өте уақытылы әрі орнықты бастама деп білемін. Өйткені өз елінің картасын, ресурстарын, экономикалық әлеуетін білмейтін азаматтан туған жерге деген жанашырлық күту мүмкін емес. Ұлттық сәйкестік пен елге деген құрмет 8-9-сынып оқушылары – өз дүниетанымын қалыптастырып, азаматтық ұстанымын айқындайтын жаста. Нақты кезеңде «Қазақстан географиясы» пәніне аптасына 2 сағат бөлінуі оқушыларға материалды асықпай, сапалы сіңіруге мүмкіндік береді.
Оқу-ағарту министрлігі тарапынан жасалған бұл жағдай – география мұғалімдері үшін үлкен мүмкіндік әрі зор жауапкершілік. Басты мақсатымыз – оқушыға құрғақ фактілерді беру емес, туған жерінің әрбір тасын, әрбір өзенін бағалайтын, елінің дамуына үлес қосуға дайын саналы да азат ойлы ұрпақ тәрбиелеу. Қазақстанның әрбір шаршы метрі – біздің ортақ үйіміз, ал оны танып-білу – өсіп келе жатқан әрбір өреннің парызы.
Алтынбек ҚЫСТАУБАЕВ,
Жамбыл атындағы №120 орта мектебінің
география пәні мұғалімі.
Қызылорда қаласы.
