Өткен сенбіде облыс әкімі Гүлшара Әбдіқалықова «Әйтек» су торабына барды. «Қазсушар» РМК Қызылорда филиалының директоры Хамит Биімбетов су торабындағы жөндеу жұмыстары туралы баяндады, деп хабарлайды облыс әкімінің баспасөз қызметі.
Сырдария өзеніндегі «Әйтек» су торабы 2004 жылы «Сырдария өзенінің арнасын реттеу және Арал теңізінің солтүстік бөлігін сақтау» жобасы (САРАТС-1) аясында салынған. Аталған су торабы «Әйтек», «Соркөл» және «Елтай» арналары арқылы күріш егістіктерін сумен қамтамасыз етуге арналған. Су торабы «Қазсушар» РМК Қызылорда филиалының теңгерімінде.
2019 жылы қыркүйекте су торабының төменгі бьеф арнасының 6,23 метр тереңдікке шайылу және ұзындығы 16,6 метр шпунтты қабырғаның 52 см тереңдікке шөгуі орын алды.
Орын алған жағдай бойынша жедел шаралар қабылданып, нысандық төтенше жағдай жарияланды. 2019 жылы төтенше жағдайларды болдырмау және жою үшін облыстық бюджеттен 38 млн теңге және Үкімет резервінен 50,0 млн теңге қаражат бөлінді.
2020 жылы жобаның жобалау-сметалық құжатын әзірлеуге республикалық бюджеттен 48,0 млн теңге және 2020 жылы «Жұмыспен қамтудың жол картасы» шеңберінде «Әйтек су торабын қайта жаңғырту» жобасына 700 млн теңге бөлініп, оның ішінде 308,1 млн теңгесі игерілді. Жобаның жалпы құны 826,3 млн теңге.
Қазіргі кезде бетон құю, армосеткалар және армокаркастар құрылыстарын орнату, насос қондырғыларымен суды сорып алу, шпунт сваяларын орнату жұмыстары жүргізілуде. Нысанда 69 инженер-техник қызметкер және басқа да жұмысшылар бар. 17 техникамен жұмыс жасалуда.
Жобаны іске асыруды аяқтау үшін 2021 жылы республикалық бюджеттен 472,9 млн теңге қаржу бөлу жоспарлануда.
Сәуір айында егін егу науқанының басталуына байланысты су торабын қайта жаңғырту жұмыстарын уақытылы аяқтау мәселесі өте маңызды болып тұр.
Облыс әкімі жұмысты уақытылы аяқтауды және бекітілген кестеге сәйкес сумен қамтамасыз ету жөнінде бірқатар тапсырма берді.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
