Байқоңырда әлеуметтік мәселелер оңтайлы шешіліп келеді. Әсіресе тұрғындар үшін өзекті – тұрғын үй, газдандыру салаларында оң істер бар. Кеше облыс әкімі Гүлшара Әбдіқалықова Байқоңыр қаласын дамыту мәселелерін қарап, ҚР Президентінің «Байқоңыр» кешеніндегі арнаулы өкілінің қызметін қамтамасыз ету басқармасының басшысы Жасұлан Абатовтың атқарған жұмыстарын саралады.
Жиында Байқоңыр қаласындағы жылу электр станциясын газға қосу мәселесі қаралды. Бүгінгі таңда қала әкімшілігі қажеттілікті ескере отырып тиісті шараларды қабылдады. Бұл ретте облыс әкімдігі мен салалық министрлік жылу электр станциясына газ жеткізу бағытында бірлескен жұмыстарды атқаруда. Егер станцияны газға қосу мәселелері толыққанды жүргізілсе, тұрғындар үшін коммуналдық қызмет төлемдері біршама төмендейді. Сондай-ақ, биыл Төретам, Ақай елді мекендерін газдандыру үшін жоба құрылысын қаржыландыруға өтінім берілді.
Басқосуда Байқоңырдағы тұрғын үйлерді қазақстандықтарға жекешелендіру мәселесі де айтылды. Бұл ретте Қазақстан-Ресей арасында талқылаулар жүргізілген. Алдағы уақытта бірлескен шешімдерді қабылдау бойынша ортақ ұстаным болады.
Қазіргі таңда Байқоңырда 75 мыңнан астам адам тұрады. Оның 66 проценттен астамы қазақстандықтар. Бұған дейін тұрғын үйлерді жекешелендіруге ғарыш кешенін пайдалану жөніндегі келісім бойынша тыйым салынған болатын.
Кездесуде талқыланған тағы бір мәселе – Байқоңыр қаласы әкімшілігіне қарасты мектептерде қазақ тілі мен әдебиеті, Қазақстан тарихы пәндерін оқыту.
Жасұлан Абатов бұл ретте қос тараптың Білім министрлігімен бірлескен шешім қабылданғаннан кейін оқыту процесіне қажетті жұмыстар жасалатынын тілге тиек етті. Ал, Байқоңырда педагогтардың оқу жүктемесіне қатысты айтарлықтай проблема болмайды.
Облыс әкімі Байқоңыр қаласында әлеуметтік мәселелерді тұрақты түрде шешу, тұрғындарға түсіндірме жұмыстарын күшейту және байқоңырлықтардың тұрмыстық әлеуетін көтеру үшін атқарылатын шаралардың уақытылы жүзеге асуын қадағалауды қаперге салды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
