ҚР Парламенті Мәжілісінің депутаттары, Мәжілістегі «Nur Otan» партиясы фракциясының мүшелері өңірдегі барлық аудандарды аралап, көпшілікті толғандырған мәселелермен танысып, халықтың ұсыныс-тілектерін тыңдап, оны шешуді қарастыру, сайлауалды бағдарламаның жүзеге асырылу барысын бақылау мақсатында Сыр өңіріне жұмыс сапарымен келді.
Мәжіліс төрағасының орынбасары Балайым Кесебаева, депутаттар Ғалым Әміреев, Бақытбек Смағұл, Геннадий Шиповских жұмыс сапарының алғашқы күнін Арал ауданынан бастады.
Ең алдымен темір жол үстінен салынатын аспалы автокөлік көпіріне белгіленген орындарды көрді. Бүгінде оған техникалық-экономикалық негіздеме әзірленіп, мемлекеттік сараптамадан өткізілген. Жоба-сметалық құжаттамасын дайындауға қаржы бөлу жұмыстары жүргізілуде. Одан соң аудандағы апатты деп танылған кітапханалар мен «Жазира» балабақшасының жағдайын көрді.
Атап өтейік, ауданда 3 кітапхана ғимараты апатты жағдайда деп танылып, 200 мың кітап қорына арналған кітапхана құрылысына жобалау-іздестіру жұмыстары жасалып, құжаттарын әзірлеуге тиісті басқармаға өтінім тапсырылған. Ал қала ішіндегі 3 балабақша апатты деп танылғандықтан, басқа ғимаратқа көшірілген.
Депутаттар «Nur Otan» партиясының фракция мүшелерімен және аудан кәсіпкерлерімен кездесіп, өңірдегі өзекті мәселелерді талқылап, ұсыныс-пікірлерін тыңдады. Кездесу барысында аудандағы қуаңшылық жағдайы, пандемияның кәсіпкерлердің жұмысына кедергісі талқыланды.
Мәжіліс төрағасының орынбасары Балайым Кесебаева аудандық филиал ғимаратында тұрғындарды жеке мәселелері бойынша қабылдап, уәждеріне құлақ түрді.
Қабылдауға келген тұрғындар мал шаруашылығына мемлекет тарапынан берілетін субсидия жөнінен қолдау көрсету, Сексеуіл кентін газдандыру, Арал қаласынан автодрон құрылысын салуға қаржы бөлу, жұмысқа орналастыру мәселелерімен жүгінді. Ұсыныстарды мұқият тыңдаған Б.Кесебаева айтылған мәселелердің шешілу жолдары қарастырылатынын жеткізді.
Халық қалаулылары Қамбаш көлінің қазіргі жағдайымен танысты. Қамыстыбас, Бөген, Қаратерең, Жаңақұрылыс елді мекендеріне барып, ауыл халқымен жүздесіп, жергілікті жердегі түйткілді мәселелерді тыңдады. Кездесуде ауыл тұрғындары қуаңшылық, жайылымдық, шабындық жерлерді суландыру, төрт түлік малға қажетті жем-шөп, жол мәселесі қиындық тудырып отырғанын жеткізді.
Сонымен қатар, ауылға жаңа балабақша, клуб қажеттігі айтылды.
Қуаңшылық бірінші кезектегі мәселе болғандықтан, депутаттар жобалар дайындалғанына, қажетті қаржының бөлінуіне ықпал жасап, бақылауда ұстайтынын айтты.
Мәжіліс депутаттары «Бөген-Ақлақ» және «Қаратерең-Жаңақұрылыс» автожолдарына жүргізіліп жатқан орташа жөндеу жұмыстарын, «Ақлақ» су тоспасын және «Жалғасбай» балық өңдеу цехының жұмысын көрді.
Мәжіліс депутаттары басқа аудандарда да сайлаушылармен кездесті.
>>> Біздің Facebook, Instagram парақшаларымыз бен Telegram каналымызға жазылыңыз! <<<