Белгілі журналист, өзіммен аралас-құралас, тонның ішкі бауындай сырлас, әріптес ініміз Пахмаддин бүгінде үш жиырма бестің белесіне шығып, қадірменді қария атанды. Әрине, сеніммен сертке жету, азамат атын жоғары қойып, өзгеге үлгі-өнеге көрсету оңай шаруа емес. Осы жолда еңбектену, іздену, тапсырылған іске деген жауапкершілік, өз міндетіне деген зор сүйіспеншілік қажет.
Мен білетін, елу жылдың көлемінде танысып, біркісідей сыйласып, аға мен інідей үзбей араласып жүрген қаламдас әріптесім Пахмаддин Айнақожаев сөз қадірін түсірмейтін қарияға айналды.
Енді Пахмаддинның өмір жолы, атқарған қызметіне аз-кем тоқтала кетсек. Ол 1951 жылы шілдеде Жаңақорған топырағында дүниеге келген.
Еңбек жолын 1968 жылы аудандық баспаханада линотипист-наладчик болудан бастаған. Бұл кеңестік дәуірдегі газет шығаруда, әріп теруде ең маңызды жұмыстың бірі болатын. Ол бүгінгідей техниканың жетілмеген кезі.
Елгезек, жазу-сызуға бейім, талап иесі Пахмаддин газеттің корректоры, еңбекші хаттар мен ауыл шаруашылығы бөлімінің меңгерушісі, газет редакторының орынбасары қызметтерін атқарды. Газеттің жұмыс жоспары, жазу мәнері, хабарлары мен мәліметтері қысқа әрі нұсқа болатын. Өйткені партияның талабы, тапсырмасы солай. Аудандағы мың-сан жұмыстың жетістігі мен кемшілігін жариялап, оның қорытындысын бақылау, сынға жауап алу газет қаламгерлерінің міндеті еді. Осындай жұмыстың ортасында қайнап, төселген ол мол тәжірибе жинады. Баспахананың директоры болған тұста әріп терушілердің, газет басушылардың, баспахананың материалдық жағдайын тұрақтандыруға күш салды.
Еңбегімен көрінген соң ДОСААФ комитетінің төрағасы қызметіне жоғарылады. Одан әрі аудандық партия комитетінің үгіт-насихат бөлімінде нұсқаушы, егемендік алғаннан кейін аудандық әкімшілікте ұлтаралық қатынастар комитетінің төрағасы, ішкі саясат бөлімінің меңгерушісі, ұйымдастыру-бақылау бөлімінің бас маманы, баспасөз хатшысы қызметтерін абыроймен атқарды.
Кеңестік кезеңде үгіт-насихат бөлімінің негізгі міндеттері бұқара арасындағы үгіт-насихат, саяси-көпшілік, экономикалық оқулар секілді қолмен ұстай алмайтын қылдай нәзік жұмыстар еді. Мереке сайын көшелер мен мекемелерге ілінетін лозунг пен шақырулардың өзі бір бөлімге жүк болатын.
Қабілет-қарымы мен тындырымдылығының арқасында ол ауданның қоғамдық-саяси өміріне белсене араласты. Ұйымдастырушылық қабілетімен танылып, әрбір тапсырманы тиянақты орындады. Адал еңбектің, абыройлы ісінің нәтижесінде басшылықтың құрметімен 2015 жылы зейнет демалысына шықты.
Онан кейін де қоғамдық жұмыстан қол үзбей келеді. Бүгінде аудандық ардагерлер кеңесі төрағасының орынбасары, «Ардагерлер мерейі» газетінің бас редакторы. Кәсіби журналист болғандықтан газеттің жоғары мазмұнда, уақытылы шығарылуына, ардагерлерге жеткізілуіне күш салады. Орынбасар ретінде ардагерлердің жер-жердегі бастауыш ұйымдарына практикалық көмек көрсетіп, заңды құқықтарын қорғау жолында да тынбай ізденеді. Аудандық ұйымның жұмысын үйлестіру, пленум, алқа, конференция материалдарын дайындау да міндетінің бірі.
Қаламгердің жаңақорғандық И.Әбдікәрімов, С.Шаумаханов, С.Далдабаев, Қ.Қалмырзаев, Б.Шоманов сынды тұлғалар туралы жазған материалдары кезінде жылы қабылданды. Ол бірнеше кітаптың редакторы. Әңгімелері мен эсселері республикалық, облыстық басылымдарда жарық көрген.
Пахмаддин Айнақожаев – ҚазГУ-дің түлегі, ҚР Журналистер одағының мүшесі. Баспасөз саласындағы қажырлы еңбегі үшін бірнеше марапатқа ие болған.
Жаңақорған ауданының құрметті азаматы Пахмаддин Айнақожаев жуырда Қазақстанның құрметті журналисі атанды.
Өмірлік жары Ұлтуар Қашқыновамен отау құрғанына биыл 50 жыл болып отыр. 6 ұл – қыз тәрбиелеген. Бәрі де жоғары білімді, әр салада еңбек етуде.
Файзулла САХИЕВ,
ақын, Қазақстан Журналистер
одағының мүшесі,
Жаңақорған ауданының құрметті азаматы
