Өткен демалыста облыс орталығындағы «Еуразия» спорт кешенінде белгілі журналист Ерқанат Сәрсенбайұлын еске алуға арналған шағын футбол турнирі алғаш рет өтті. Өмірден ерте кетсе де артында өшпес із, жарқын естелік қалдырған азамат, білікті маман, қарымды журналист, елге сыйлы әріптес есімін ұлықтауға облыс және қала әкімдігі қолдау көрсетті.
Турнирдің ашылу салтанатында қала әкімінің орынбасары А.Нұрмағанбетов, облыс әкімінің баспасөз хатшысы С.Шаханова, «Сыр медиа» ЖШС директоры М.Аралбаев, республикалық «Егемен Қазақстан» газетінің меншікті тілшісі М.Жетпісбаев және Ерқанат Сәрсенбайұлының анасы Алтынгүл апа қатысушыларға сәттілік тіледі.
– Қамшының сабындай қысқа ғұмырында айналасына жиылған жұрттың бірін аға, бірін дос, бірін бауыр қылған жайсаң жан, қалам қуатымен елге танылған Ерқанат Сәрсенбайұлы журналистикадан бөлек, ішкі істер органы, дін және халыққа қызмет көрсету орталығында қызмет істеді. Баспасөз қызметі мен телевизияда абыройлы еңбек етіп, ақпарат саласында өзіндік қолтаңбасын қалдырды. Білімі, ұйымдастырушылық қабілетімен абыройға бөленді. Жақсы ісімен ел жадында қалған оның ұстанымы адамгершілік еді. Азамат есімі халық жадында сақталуына, бұқаралық спорттың дамуы мен жастарға патриоттық тәрбие беруге үлес қоссақ деген марқұмның отбасы, бауырлары және достарына алғысым шексіз, – деді Арнұр Нұрмағанбетов.
Мұнан соң облыс әкімінің баспасөз хатшысы С.Шаханова аймақ басшысының арнайы құттықтауы мен тағайындаған қаржылай қорын Ерқанат Сәрсенбайұлының анасына табыстап, ұйымдастырушыларға өз лебізін білдірді.
Спорттық шараға жергілікті БАҚ өкілдері мен мемлекеттік мекемелерден құралған 6 команда қатысты. Алты сағатқа созылған шағын футболдың үздіктері белгілі болды. Жарыс қорытындысымен І орынды «Qyzylorda» телеарнасының командасы иеленді. ІІ орын республикалық басылымдардың меншікті тілшілерінен құралған командаға бұйырса, ІІІ орынды «Сыр медиа» командасы еншіледі. Сондай-ақ өзге де қатысушы топтар жүлдесіз қалған жоқ. Мұнан бөлек, «Үздік қақпашы», «Үздік қорғаушы», «Үздік шабуылшы» және «Үздік ойыншы» номинациялары жекелей табысталды. Жеңімпаздар мен жүлдегерлер арнайы диплом, кубок-медальдармен және қаржылай сыйлықпен марапатталды.
Ержан ҚОЖАС,
«Сыр бойы».
Суретті түсірген
Нұрболат НҰРЖАУБАЙ
