«Ақ жол» Қазақстанның демократиялық партиясының төрағасы Азат Перуашев партияластарымен бірге Премьер-Министр лауазымына Олжас Бектеновтің кандидатурасын неліктен қолдағанын айтты, деп хабарлады KAZINORM.
«Бұл шешім тек өзіңнің ерік-жігеріңе ғана емес, парламенттік көпшілік Үкімет басшысын анықтаған кездегі парламентаризмнің жалпы принциптеріне де байланысты. Екінші мәселе – біз Олжас Абайұлын көп жылдан бері мемлекеттік қызметте, нақтырақ айтқанда экономикада, сыбайлас жемқорлыққа қарсы іс-қимыл, капиталды қайтару тұрғысында жұмыс істеген адам ретінде жақсы білеміз. Ол сыбайлас жемқорлыққа қарсы іс-қимыл агенттігінің басшысы кезінде капиталды қайтару мәселесін бірге талқылаған едік», – деп атап өтті Азат Перуашев Мәжілістің жалпы отырысынан.
Оның атап өтуінше, Үкіметтің бұған дейінгі құрамы Мемлекет басшысының қыркүйектегі Жолдауында берілген индустрияландыру, экономиканы өнеркәсіптік пішінге көшіру тапсырмасын лайықты деңгейде пысықтай алмады.
«Олжас Бектенов – зиялы, бірақ өте қатал адам. Бүгінде Үкіметке жетіспейтін дүние – осы. Әдемі баяндамалар жасалып, ал содан кейін бәрі бюрократиялық кабинеттерде батып қалады. Қорытындысында билік вертикалі жұмыс істемейді, атқарушылық тәртіп әлсіз. Меніңше, Бектеновтің алдында тұрған міндеттердің бірі – экономикалық түрленуді жүзеге асыру, жаңа экономикалық модель қалыптастыру және қатаң атқарушылық тәртіпке қол жеткізу», – деді Азат Перуашев.
>>> Біздің Facebook, Instagram парақшаларымыз бен Telegram каналымызға жазылыңыз! <<<
