Туған жердің табиғаты, тыныс-тіршілігі, онда ғұмыр кешкен қарапайым адамдардың көзге түсе бермейтін, тек көңілмен ғана сезетін қадір-қасиеті туралы шынайы сезім шап-шағын әңгімелерге арқау болған «Ауылдың дәмі» атты жаңа кітап оқырманға жол тартты.
Сыр перзенті, ақын, журналист Бекжан Сүлейменовтің туындысының таныстырылымы Ә.Тәжібаев атындағы облыстық кітапханада өтті.
Мазмұнды іс-шараға Қазақстанның еңбек сіңірген қайраткері, Мәдениет қайраткері, «Парасат» және ІІІ дәрежелі «Барыс» ордендерінің иегері, профессор, жырау Алмас Алматов, Рзақұл Нұртаев, Мейрамбек Исаев сынды ел ағалары, «Qyzylorda» телеарнасы директорының орынбасары Айсұлу Қасымова және «Сыр бойы» газетінің жауапты хатшысы Дәуіржан Елубаев сияқты әріптес, замандастары қатысып, қалам иесінің шығармашылығы жайлы, жаңа кітабына ой-пікірлерін ортаға салды. Сондай-ақ ауылдастары, бірге өскен жора-жолдастары да қаламгердің көңіл түкпіріндегі аядай ғана аяулы мекені – «Кекіреліде» өткен балалық шағындағы қызықты сәттерді әсерлі әңгімелеп, кітап авторына сый-құрмет көрсетті.
«Ауылдың дәмі» кітабында автордың туған жер, ауыл өмірі, елдік ұстаным, ұлттық құндылықтар, сондай-ақ қарапайым адам бойындағы адалдық, адамгершілік туралы толғаныстары мен тағылымды естеліктері қамтылған. Жалпы қазақ ауылының тыныс-тіршілігі, ұрпақ тәрбиесі, ұлттық болмыс пен рухани сабақтастық тақырыбы тарқатылған. Айтса айтқандай, «Үшінші якорь», «Абай көшесінің алыбы», «Қаппардың конторы», «Біздің шал», «Бөлекбайдың кенжесі», «Көңіл дастарханы» сияқты әңгімелер алыста қалған ауыл өмірін көз алдыңа әкеліп, көңілге жылылық ұялатады.
Кеште жыраулар Қасарбек Кәрібаев, Әділхан Қуаңбаев Сыр сүлейлері шығармаларынан жырласа, жас жыршы Тоғжан Бақытова кітап авторы Бекжан Сүлейменовтің туған жерге арнауын орындап, көпшіліктің ыстық ықыласына бөленді.
Кездесу барысында сөз алған кітап авторы Бекжан Сүлейменов шығармаларының жазылуына әсер еткен негізгі идея туған жерге деген терең сағыныш екенін айтты.
– Менің өміріме өзіндік қолтаңбасын қалдырған адамдар мен бала кезден санамды сілкілеген оқиғалар жайлы ара-тұра жазып жүргеніме де едәуір уақыт болған екен. Осы дүниелердің дені әлеуметтік желідегі парақшамда жарияланды. Жанымды шұғылалы нұрға бөлеген жүрегімдегі осы жылы естеліктердің азамат болып қалыптасуыма септігі тигенін, өмір мектебінің оқу-әдістемелік құралы болғанын мойындаймын. Маған әсер еткен, мені шыңдаған өмір баспалдақтары өзіндік қиындығымен, өзіндік ерекшелігімен жадымда жаңғырып жатыр, – деді ол.
Сөзін түйіндей келе ауылдан жырақта жүрген әрбір адам осындай сезімді басынан кешетінін айтып, осы тақырыптағы өлеңдерін оқыды. «Кекірелі» атты өлеңінде:
Қарсы алған қонағындай самолетті,
Жамалар ой дегенің ой үстіне.
Сол елде ағыл-тегіл заман өтті,
Бозторғай ұялаған қой үстіне.
Жадынан білем елдің көшпейтінін,
Жазмышқа не шара деп көніп кеткен.
Ауылдың ұғынамын өшпейтінін,
Адамның жүрегіне еніп кеткен, – деп өзі жырлағандай, адам баласы үшін ауыл өмірі ақ пейіл, адал ниет, тамыры терең жалғасқан тұтас тіршіліктің түп қазығы болып қала бермек.
Ғазиза ӘБІЛДА
«Сыр бойы»
