Футболдан 2026 жылғы Әлем чемпионаты шешуші кезеңге аяқ басты. Биылғы мундиаль алғаш рет 48 құраманың қатысуымен өтіп жатқандықтан, плей-оффтың 1/16 финалдық кезеңі де тарихта тұңғыш рет ұйымдастырылуда. 28 маусымда басталған бұл сын үшінші шілдеге дейін жалғасады. Әр кездесуде қателесуге мүмкіндік жоқ – жеңген команда жарысты жалғастырса, жеңілгені бірден турнирмен қоштасады.
Алғашқы алты матч жанкүйерлерге тартысқа толы футбол, күтпеген нәтижелер мен тарихи оқиғалар сыйлады. Ең үлкен сенсациялардың бірі Германия құрамасының жарыстан шығып қалуы болды. Парагваймен негізгі және қосымша уақытта 1:1 есебімен тең түскен немістер пенальти сериясында 3:4 есебімен жеңіліп, Әлем чемпионаттары тарихында алғаш рет 11 метрлік айып соққылары сериясында жеңіліс тапты.
Тағы бір драмалық кездесу Нидерланд пен Марокко құрамалары арасында өтті. Коди Гакпо голландиялықтарды алға шығарғанымен, Марокко соңғы минуттарға дейін күресті тоқтатқан жоқ. 90+1 минутта таразы басын теңестірген африкалықтар пенальтиде басым түсіп, ширек ғасырдағы ең ірі жетістіктерінің біріне қол жеткізді. Матчтан кейін Нидерланд құрамасының бас бапкері Рональд Куман қызметінен кететінін мәлімдеді.
Норвегия да тарихи белесті бағындырды. Кот-д’Ивуарды 2:1 есебімен тізе бүктірген скандинавиялықтар Әлем чемпионаты плей-оффындағы алғашқы жеңісіне қол жеткізді. Команданың шешуші добын кездесудің 86-минутында Эрлинг Холанд соғып, өз құрамасын келесі кезеңге алып шықты.
Бразилия өз жанкүйерлерін соңғы секундтарға дейін алаңдатты. Жапония бірінші таймнан кейін есепте алда болғанымен, үзілістен соң Каземиро таразы басын теңестірді. Ал 90+5 минутта Габриэл Мартинелли жеңіс голын соғып, бес дүркін Әлем чемпиондарын 1/8 финалға шығарды.
Канада турнирдің плей-офф кезеңін жеңіспен бастап берді. Оңтүстік Африка Республикасына қарсы өткен матчтың тағдыры қосылған уақыттың бесінші минутында шешіліп, канадалықтар минималды есеппен келесі айналымға өтті.
Франция құрамасы да өз деңгейін көрсетті. Швецияны 3:0 есебімен сенімді жеңген вице-чемпиондар ойын тізгінін толық бақылауда ұстап, фаворит мәртебесін тағы бір мәрте дәлелдеді. Команданың көшбасшысы Килиан Мбаппе кезекті екі голын соғып, шабуылдағы тиімділігін паш етті.
Осы уақытқа дейін өткен кездесулердің қорытындысы бойынша 1/8 финалдың алғашқы жұптары да белгілі болды. Канада Мароккомен кездессе, Бразилия Норвегиямен жолығады. Ал сенсация авторы Парагвай Франция құрамасымен күш сынасады.
Плей-оффтың қалған он кездесуі 1-4 шілде аралығында өтеді. Алдағы күндері Мексика – Эквадор, Англия – Конго Демократиялық Республикасы, Бельгия – Сенегал, АҚШ – Босния және Герцеговина, Испания – Австрия, Португалия – Хорватия, Швейцария – Алжир, Австралия – Египет, Аргентина – Кабо-Верде және Колумбия – Гана құрамалары өзара мықтыны анықтайды.
Әлем чемпионатының шешуші кезеңі алғашқы күндердің өзінде-ақ жанкүйерлер күткеннен де қызықты өрбуде. Сенсациялар, соңғы минуттардағы голдар мен пенальти сериялары мундиальдың тартысын арттыра түсті. Енді әрбір матчтың бағасы бұрынғыдан да жоғары. Себебі келесі қателік кез келген құраманың Әлем чемпионы атану арманын аяқтауы мүмкін.
Бағлан АМАНЖОЛ,
«Сыр бойы»
