Теміржол вокзалдарын ретке келтіру жөніндегі Президент тапсырмасын пәрменді орындап отырған өңірдің бірі – Қызылорда.
Бұған дейін облыс орталығындағы тарихи теміржол вокзалы күрделі жөндеуден өтті. Жаңа кейіпке енген ғимараттардың аумағы абаттандырылып, ондағы халыққа қызмет жүйесі жанданды. Одан кейін жеті вокзал мен екі қызмет көрсету пунктін күрделі жөндеу және қайта жаңғыртуға 10 млрд теңгеден астам қаржы бөлінді. Осының негізінде жуырда ғана Жаңақорған, Шиелі және Қазалы теміржол вокзалдары ел игілігіне берілді.
Ал күні кеше Арал ауданындағы Сексеуіл теміржол вокзалының ашылу рәсімі өтті. Салтанатты шараға облыс әкімінің орынбасары Бахыт Жаханов, аудан әкімі Аманжол Оңғарбаев, «Қазақстан темір жолы» ұлттық компаниясы» АҚ Қызылорда магистральдық желі бөлімшесінің директоры Батырхан Базарбаев, сала ардагерлері, ел ағалары және кент тұрғындары қатысты.
– Бүгін Сексеуіл кентіндегі 1 млрд 360 млн теңгеден астам қаржыға салынған, аумағы 9129 шаршы метр жаңа теміржол вокзалының ашылуына куә болып отырмыз. Бұл – аймақ үшін маңызы зор жобалардың бірі. Баршаңызды жаңа вокзалдың пайдалануға берілуімен шын жүректен құттықтаймын, – деді Бахыт Дүйсенұлы салтанатты рәсімде.
Мұнан кейін Батырхан Базарбаев құттықтау сөз сөйлеп, сала ардагері Орынбай Оразаев ақ батасын берді. Теміржол саласының дамуына үлес қосып келетін бірқатар азаматтар мен вокзал құрылысын сапалы жүргізген мердігер мекеме өкілдері облыс әкімінің Алғыс хатымен марапатталды.
Жалпы Сексеуіл теміржол вокзалының құрылысы өткен жылы қазіргі ҚР Премьер-министрінің бірінші орынбасары Нұрлыбек Нәлібаевтың бастамасымен басталған болатын. Жаңа вокзал тәулігіне 281 жолаушыға қызмет көрсетеді. Барлық талаптарға сай жоғары сапалы жабдықтармен қамтылған. Ана мен бала бөлмесі, медициналық пункт, жүк сақтау қоймасы, күту залы және санитарлық-тұрмыстық орындар қарастырылған.
Айта кетейік, қазіргі таңда облыс арқылы халықаралық және өңіраралық бағыттарда 15 жолаушылар пойызы қатынайды. Оның ішінде облыс орталығынан Астана, Петропавл, Павлодар, Көкшетау, Семей және Түркістан қалаларына қатынайтын 6 жолаушылар пойызы қызмет көрсетеді.
«СБ» ақпарат
