Қарқынды құрылыс алаңына айналған Қызылорда қаласындағы Сырдарияның сол жағалауында көпқабатты тұрғын үй саны күн өткен сайын артуда. Қаншама отбасы қоныс тойын тойлап, қуанышқа кенеліп жатыр. Зәулім ғимараттар шаһар ажарын айшықтай түсуде. Осы ретте жаңадан бой көтеріп жатқан көпқабатты тұрғын үйлердің құрылыс алаңына арнайы баспасөз туры ұйымдастырылған еді.
Қала тұрғындарын жайлы баспанамен қамту ұдайы жалғасып келеді. Мәселен «Сәт-Сервис» және «СК Дәнекер» мекемелеріне тиесілі 7 қабатты 244 пәтерлік тұрғын үйдің құрылысы былтыр қазан айында басталған. Жобаға сәйкес, биыл қараша айында аяқтау жоспарланған. Бүгінде 7 қабатты үш тұрғын үйдің біреуі толық аяқталып, қалғанында жұмыс жалғасуда.
«Ер Ару» құрылыс мекемесінің прорабы Болатбек Темірбаев құрылыстың сапалы әрі уақытылы жүргізіліп жатқанын айтып берді.
– Жоба бойынша 7 қабатты 8 тұрғын үй салып жатырмыз. Қазір 4 тұрғын үйдің құрылысы аяқталуға жақын. Былтыр тамыз айында басталды. Мұнда тұрғындар үшін қолайлы жағдай қарастырылған. Ойын, футбол алаңы, тынығу орны бар. Құрылыс материалдары жеткілікті әрі сапалы. Бригада жұмысын тиянақты атқаруда, – дейді ол.
Қазір құрылыс алаңында жұмыс қызған. «Орион ЛТД», «Интегрострой», «Авангард ПГС», «ПромстройСервис Е», «Асар», «АманҚұрылыс», «Абу-Сер», «Мелиоратор» мекемелері отандық тауарларды қолданады.
«Сәт -Сервис» құрылыс мекемесінің аумақ бастығы Бердібек Қамиев жұмыс барысына тоқталды.
– «Сәт-Сервис» құрылыс мекемесіне тиесілі 7 қабатты 244 пәтерлік тұрғын үй салынуда. Былтыр кіріскен болатынбыз. Жыл соңына дейін тапсырамыз. Қазір 7 қабатты 3 тұрғын үйдің біреуінің құрылысы аяқталды. Қалған екеуі уақытында бітеді. Құрылыс материалы, жұмысшы күші жеткілікті. Әр үйдің ауласына балалар ойын алаңы, автотұрақ салынуда, – дейді ол.
Жаңа тұрғын үйлер – қаланың көркеюіне, тұрғындардың өмір сапасын арттыруға бағытталған маңызды қадам.
Баспасөз туры барысында жеті көпқабатты тұрғын үйдің ішкі жұмыстарын көріп шықтық. Жобаға сәйкес кіреберіс жол кеңейтілген, үй ауласы көлік тұрағымен, спорт және балалар ойын алаңдарымен, демалыс аумақтарымен толық қамтылады.
Сара АДАЙБАЕВА,
«Сыр бойы»
