Аралдағы «Балықшылар аллеясында» «Әке – отбасы бақытының кілті» тақырыбымен тағылымды шара өтті.
Шаңырақтың берекесі, балаларын бақытына балаған асыл тұлғалардың орны қашанда айрықша екенін аңғартқан салтанатты кеште ұрпағына жол көрсеткен дана тұлғаларды қадірлеу маңызды екені айтылды. Қазақы болмысқа тән ұрпақтар сабақтастығы сахналанды. Аудан әкімі Аманжол Оңғарбаев:
– Арал өңірінің тарихы мен тағдырын әрі туған жерге деген перзенттік сүйіспеншілікті ән арқылы дәріптеуді мақсат еткен «Ән қанатындағы Арал» атты республикалық жабық ән байқауы жоғары деңгейде ұйымдастырылып, өз мәресіне жеткен болатын. Байқауға еліміздің түкпір-түкпірінен кәсіби және әуесқой композиторлар қатысып, Арал тақырыбында жазылған жаңа туындыларды ұсынып, тың шығармалар әнсүйер қауымның жүрегіне жол тартты. Сол шығармалардың ішінен қазылар алқасының жоғары бағасына ие болған белгілі композитор Рамазан Таймановтың «Аралым» әні әуені мен сөзі келісіп, тыңдарман қошеметіне бөленген-ді. Осыған орай «Аралым» әні үшін арнайы жүлде Қазақстанның еңбек сіңірген қайраткері, «Құрмет» орденінің иегері, Қызылорда облысының құрметті азаматы Рамазан Таймановқа табысталады, – деді.
Мұнан соң аудан басшысы үлгілі әкелерді Алғыс хатпен марапаттады. Жергілікті өнерпаздар ән-жырдан шашу шашты. Салтанатты шараға арнайы келген композитор Рамазан Тайманов, ақын Дүйсенбек Аяшұлы рухани бастамаға ұйытқы болған аралдықтарға ризашылық білдірді.
А.ЖАЙШЫЛЫҚ
