Балық қорын сақтау мен су айдындарының экологиялық жағдайын жақсартуға бағытталған «Таза су айдындары» және «Уылдырық-2026» республикалық акциялары аясында ауқымды жұмыстар атқарылуда. Оған мемлекеттік органдар, құқық қорғау құрылымдары және қоғам өкілдері жұмылдырылған. Бұл туралы өңірлік коммуникациялар қызметінде өткен брифингте Арал-Сырдария облысаралық бассейндік балық шаруашылығы иснпекциясы басшысының орынбасары Жанқожа Сапаров тарқатып айтты.
– Өңірімізде балық ресурстарын сақтау, су айдындарының экологиялық жағдайын жақсарту және табиғат пайдалану заңнамасының сақталуын қамтамасыз ету бағытында кешенді жұмыс жүргізіліп келеді. Осы мақсатта өңірде «Таза су айдындары» республикалық табиғат қорғау акциясы мен «Уылдырық-2026» балық қорғау акциясы кең көлемде ұйымдастырылды. Су айдындарын тазарту, заңсыз балық аулаудың алдын алу және балықтың табиғи көбеюіне қолайлы жағдай жасау бағытында нақты нәтижелерге қол жетті. Мәселен, «Таза су айдындары» акциясы барысында облыс аумағындағы өзен-көлдер мен су айдындары қоқыстан тазартылды. Акцияға 397 адам, 68 арнайы техника және 5 шағын жүзу құралы тартылып, су айдындарынан 10 тоннадан астам тұрмыстық қалдық шығарылды. Бұған қоса, балық қорына айтарлықтай қауіп төндіретін суда қалған 78 ау қалдығы табылып, жойылды. Бұл жұмыстар су экожүйесін сауықтыруға және балықтың табиғи мекендеу ортасын сақтауға мүмкіндік берді. Су айдындарының тазалығы мен байлығын келер ұрпаққа аман жеткізу – тек жауапты органдардың ғана емес, барлық азаматтың ортақ міндеті, – деді ол.
«Уылдырық-2026» акциясында облыстағы су айдындарында балықты уылдырық шашу кезінде қорғау шаралары күшейтілген. Нәтижесінде заңсыз балық аулаудың ондаған дерегі анықталып, әкімшілік хаттамалар толтырылыпты. Бірқатар іс сотқа жолданған. Нақты кезеңде құқық қорғау органдарының өндірісінде қылмыстық сипаттағы істер қаралуда.
Сондай-ақ заң бұзушылардан жүздеген келі заңсыз ауланған балық пен оннан астам құрал тәркіленіп, табиғатқа келтірілген залалды өтеу шаралары жүргізілуде. Жалпы, аталған акциялар табиғи ресурстарды қорғау мәдениетін қалыптастыруға, браконьерлікке қарсы күресті күшейтуге және өңірдің балық қорын сақтауға бағытталған маңызды бастамалардың тиімділігін көрсеткен.
«СБ» ақпарат
