Бүгінде жедел жәрдем қызметіне түсетін жүктеме де қалыпты деңгейде түсіп отыр. Облыстық денсаулық сақтау басқармасының дерегіне сүйенсек, шақырту саны індет өршіген маусым-шілде айларымен салыстырғанда 56,8 процентке төмендеген. Әсіресе, тыныс алу жолдарының аурулары 6 есеге азайған.
Эпидмаусым кезінде күнделікті 1000-нан астам шақырту тіркелсе, қазіргі уақытта 150-170 шақырту түсуде. Сондай-ақ, шақыртулар ішінде пневмонияға күмәнді жағдайлар 14,4 есеге азаюымен қатар, ауыр жағдайдағы науқастар тіркелмеуде.
1-3 санат бойынша шақыртулар жүктемесі бір топқа тәулігіне 14-15 болса, 4 санатты жедел жәрдем тобына 18-20 ғана шақырту түсуде. Бұл өткен аймен салыстырғанда 2 есеге төмен.
Премьер-министр Асқар Маминнің төрағалығымен өткен мемлекеттік комиссия отырысында Үкімет басшысы карантин шараларын кезең-кезеңімен алып тастау жоспарын бекітуді тапсырған болатын. Осыған орай, мемлекеттік комиссия 17 тамыздан бастап карантин шараларын алып тастау жоспарын бекітті. Онда барлық өңірлерде жұмысын қайта бастайтын кәсіпкерлік субъектілерінің қызмет түрлерінің тізбесі бекітілді.
Сонымен келесі аптадан бастап сауда үйлері, сауда желілері, жабық базарлар, сұлулық салондары, спа орталықтары, шаштараз, бассейні жоқ фитнес орталықтары, бассейні жоқ моншалар мен сауналар, балаларға арналған түзету кабинеттері, балаларға және ересектерге білім беру орталықтары, мектепке дейінгі балалар мекемелерінің кезекші топтары, тағы да басқа қызмет түрлері белгіленген талаппен жұмыс істейтін болады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
