Кеше облыс әкімі Гүлшара Әбдіқалықованың төрағалығымен тұрғын үй құрылысы мәселелері жөнінде жиын өтті. Онда биыл кредиттік тұрғын үйді салу және пайдалануға беру, жалға берілетін тұрғын үйлерді салу және сатып алу, баспанасы апаттық деп танылған азаматтарды тұрғын үймен қамтамасыз ету және құрылыс материалдарының қымбаттауы мәселелері бойынша төрт сұрақ талқыланды.
Облыстық құрылыс, сәулет және қала құрылысы басқармасының басшысы Бердияр Пірімбетов пен «Отбасы банкі» Қызылорда филиалының директоры Әділжан Сәулебаев кредиттік тұрғын үйді салу және пайдалануға беру бағытында атқарылған жұмыстарды баяндады.
Осы жылы 644,7 мың шаршы метр тұрғын үй пайдалануға беру жоспарлануда. Облыс бойынша «Нұрлы жер» мемлекеттік бағдарламасы аясында 2158 пәтерді құрайтын 105 тұрғын үй құрылысы жүргізіліп, жыл аяғына дейін 1608 пәтерді құрайтын 94 тұрғын үй пайдалануға берілмек.
Қызылорда қаласы бойынша СПМК-70 тұрғын ауданында 940 пәтерлік 19 үйдің құрылысын жүргізу межеленген. Оның ішінде, былтыр 640 пәтерлік 13 кредиттік тұрғын үйдің құрылысы басталған болатын. Биыл осы үйлер пайдалануға берілу үшін газ желілерін жүргізу аяқталуы қажет. Арал ауданында 40 пәтерлік 10 үйдің, Қазалы ауданында 40 пәтерлік 10 үйдің, Жалағаш ауданында 10 пәтерлік 10 үйдің, Шиелі ауданында 25 пәтерлік 25 үйдің құрылысы аяқталған. Аудан әкімдіктері мен «Отбасы банкі» арасында меморандум жасалған. Алдағы уақытта кредиттік үйлер пайдалануға беріледі.
Аймақ басшысы қалалық бюджет есебінен СПМК-70 тұрғын ауданындағы 13 кредиттік көпқабатты тұрғын үйді газ желісімен қамтамасыз етіп, 1 қарашаға дейін құрылысын аяқтауды және «Отбасы банкі» Қызылорда филиалымен бірлесіп, салынған кредиттік үйлердегі пәтерлерді өткізу бағытында жұмыстарды жеделдетуді, өткізілмеген пәтер санын анықтап, апатты үйлер тұрғындарына қайта бағыттауды тапсырды. Сонымен қатар, Арал, Қазалы, Жалағаш, Шиелі ауданы әкімдіктеріне 1 қазанға дейін салынған несиелік үйлерді өткізуді жүктеді.
Күн тәртібіндегі екінші және үшінші мәселе бойынша атқарылған жұмыстарды Бердияр Пірімбетов тізбектеді. Биыл барлығы 945 пәтерді құрайтын 54 жалға берілетін үй құрылысына бюджет есебінен қаржы бөлінген. Қызылорда қаласындағы Сырдария өзенінің сол жағалауында 590 пәтерлік 12 көпқабатты тұрғын үй, Шиелі ауданында 72 пәтерлік 4 үй, Сырдария ауданында 33 бірқабатты тұрғын үй биыл пайдалануға берілмек. 2021 жылдың қорытындысымен өңірде жалға берілетін 695 пәтерді құрайтын 49 тұрғын үй пайдалануға беріледі. Оның ішінде, 232 пәтер халықтың әлеуметтік жағынан осал топтарына, 463 пәтер аз қамтылған көпбалалы отбасыларға бөлінетін болады.
Сонымен қатар, 2021 жылы аз қамтылған көпбалалы отбасылар үшін 342 жалға берілетін пәтер сатып алу мақсатында Ұлттық қордан қаржы бөлінді. Қызылорда қаласында 192, Арал ауданында 35, Қазалы ауданында 35, Қармақшы ауданында 10, Жалағаш ауданында 20, Сырдария ауданында 10, Шиелі ауданында 20, Жаңақорған ауданында 20 пәтер сатып алынады. Бұл үйлердің құрылысы жүргізілуде. Айта кету керек, Байқоңыр қаласында жалға берілетін 250 пәтерлік 5 үйдің құрылысы басталады деп жоспарлануда.
Облыс әкімі Г.Әбдіқалықова Қызылорда қаласының әкімі Ғанибек Қазантаевқа жылумен жабдықтаудың сыртқы желілерінің құрылысын 15 қыркүйекке дейін толық аяқтап, пайдалануға беруді, қысқа мерзімде барлық тұрғын үйлерді абаттандыру мәселесін шешіп, қазан айынан бастап кезекте тұрған азаматтарды қоныстандыруды жүктеді. Сырдария ауданына қарасты елді мекендердегі 33 жалға берілетін тұрғын үй құрылысын аяқтап, аз қамтылған көпбалалы отбасыларды кезекке сәйкес қоныстандыруды 1 қыркүйекке дейін қамтамасыз етуді, Шиелі кентіндегі 72 пәтерлік 4 жалға берілетін тұрғын үй құрылысын аяқтап, желтоқсан айына дейін қоныстандыруды тапсырды. Сонымен қатар, Байқоңыр қаласындағы 250 пәтерлік 5 үйдің құрылысын бақылауға алып, аз қамтылған көпбалалы отбасылар үшін пәтер сатып алудың ағымдағы жылғы жоспарын орындау қажет екенін айтты. Тағы бір тапсырма, бір ай мерзімде орындалмауы мүмкін жағдайлар пысықталып, қаражатты аудандарға қайта бағыттау жөнінде нақты ұсыныстар енгізу туралы болды.
Жиында облыс әкімі тарапынан Сырдария өзенінің сол жағалауындағы 50 пәтерлік үйдің құрылысын аяқтау және апатты үйлер тұрғындарына пәтерлерді кезекке сәйкес 1 қыркүйекке дейін бөлуді қамтамасыз ету және несиелік тұрғын үйлердегі сатылмаған пәтерлер санын анықтап, апатты үйлер тұрғындарына қайта бағыттау тапсырылды. Сондай-ақ, Арал ауданындағы апатты үйлерде тұратын 14 отбасын үймен қамту бойынша ұсыныс енгізу қажет екені айтылды. Еске салайық, жаңа тұрғын үй саясатына сәйкес 2022 жылдан бастап жалға берілетін тұрғын үй құрылысына қаражат бөлінбейді.
Төртінші мәселе – құрылыс материалдарының қымбаттауына қатысты облыстық құрылыс, сәулет және қала құрылысы басқармасының басшысы мәлімдеме жасады. Соңғы алты айда құрылыс материалдары мен жанар-жағармай бағасының күн сайын қарқынды өсуі байқалады. Жүргізілген талдаулар нәтижесінде құрылыс материалдарының бағасы сметалық бағадан едәуір асып түсетіні анықталды, яғни, материалдардың бағасы қолданыстағы сметалық бағалармен салыстырғанда орта есеппен 96% өскен.
Облыс әкімі 10 проценттен астам қымбаттаған барлық салынып жатқан құрылыс нысандарына талдау жүргізу, сметалық құнды ұлғайтуды талап ететін нысандар бойынша қаржылық аудит жүргізу үшін барлық қажетті құжаттарды әзірлеуді ұйымдастыру бойынша тапсырма беріп, олардың орындалуын бақылауды орынбасары Серік Сүлейменовке жүктеді.
>>> Біздің Facebook, Instagram парақшаларымыз бен Telegram каналымызға жазылыңыз! <<<