Қызылорда қаласындағы «Мұз айдыны» спорт кешенінде волейболдан спорт ардагері, бапкер Тұрғанбек Алтынбековті еске алуға арналған жасөспірімдер арасында облыстың ашық турнирі өтті. Оған Қызылорда қаласы, облыс аудандары және Жамбыл облысы Байзақ ауданынан командалар қатысты.
Тұрғанбек Ержанұлы Алтынбеков – Қызылорда облысында волейбол спортының негізін қалаушылардың бірі. Саналы ғұмырын осы спорт түрін дамытуға, жас ұрпақты тәрбиелеуге арнаған көрнекті тұлға.
Ол ұзақ жылдар бойы өңірдегі волейбол қозғалысының көшбасшысы болып, мыңдаған жас спортшының қалыптасуына ықпал етті. Өзінің кәсіби біліктілігі мен ұйымдастырушылық қабілетінің арқасында Сыр өңірінде волейболдың кеңінен қанат жаюына, бұқаралық сипат алуына және жоғары деңгейде дамуына зор еңбек сіңірді.
Бұл жарыс – спорттық сайыс қана емес, аймақ спортының дамуына өлшеусіз үлес қосқан арда азаматтың жарқын бейнесін ұлықтайтын тағылымды шара.
Жарыс барысында 2012-2013 жылдары дүниеге келген ұлдар арасында Қызылорда қаласы, Арал, Қазалы, Сырдария аудандары, №2 ООРМБЖМ, Шиелі ауданынан екі және Жамбыл облысы Байзақ ауданынан команда келді. Бас жүлде шиелілік волейболшыларға бұйырса, одан кейінгі орындарды №2 ООРМБЖМ және сырдариялық команда өзара бөлісті.
Ал 2014-2015 жылғы жасөспірімдер арасында барлығы алты команда сынға түсті. Олардың қатарында Қызылорда қаласы, Арал ауданы, Шиеліден екі, №2 ООРМБЖМ, Жамбыл облысы Байзақ ауданының командалары бар. Үздік үштікті Шиелі ауданының бірінші және екінші, Жамбыл облысының командалары өзара бөлісті.
Әділжан ҮМБЕТ,
«Сыр бойы»
