Батырхан Тұрмұратов пен Күлбарам Есенеева дәрігер акушер-гинеколог, кәсіби тәжірибесі мен білімін ана мен бала денсаулығын қорғау жолына арнаған.
Олар 2007 жылы Астана медицина университетіне түскен кезде танысады. Жалпы медицинаны бітіргеннен кейін, «акушерия және гинекологияны» таңдап, одан әрі бірге білім алды. Соңғы курста отбасын құрды. Қол ұстасқан жастар Қазалы аудандық ауруханасына жұмысқа орналасты. «Дипломмен – ауылға!» бағдарламасының игілігін көріп, бірреттік көтерме жәрдемақы алды. Онда біраз тәжірибе жинады, шыңдалды. Ісіне деген жауапкершілігі артты. Қаншама сәбидің өмірге аман-сау келуіне ықпал етіп, аналарға сапалы медициналық көмек көрсетті. Көптің алғысына бөленді. 2024 жылы Қызылорда қаласына қоныс аударып, облыстық перинаталдық орталықта жұмысын жалғастырды. Батырханның айтуынша, мұнда жұмыс еселене түскен. Күнделікті қаншама ана сәбиін құшағына алады. Ал бұл процесс дәрігер біліктілігінің арқасында жүзеге асады.
– Өмірге сәби әкелу оңай емес. Жүкті әйел босануға келгеннен кейін жағдайын бақылауға аламыз. Арнайы палатаға орналасады, заманауи құрылғылар қолданамыз. Әр ананың денсаулығына байланысты босануды барынша сауатты жүргізуге тырысамыз. Шүкір, пациенттен тек алғыс алып келеміз. Қиын сәтті ұмыттыратын бір мезет бар, ол – сәби үні, – дейді Батырхан Тұрмұратов.
Білікті дәрігермен әңгімелесу кезінде мына бір қызық жайтты естіп, таңғалдық. Ол алып сәбиді де табиғи жолмен босандырып, өз ісінің білгірі екенін сан мәрте дәлелдеген. Әдетте салмағы үлкен шақалақты кесарь тілігімен өмірге әкеліп жатады. Ал Батырхан салмағы 5,500 келі болатын сәбиді босану кезіндегі зақымданусыз тудырған.
Жары Күлбарам да перзентханаға түскен әрбір әйелге ерекше ықыласпен қарайды, жылы сөзімен күш-жігер береді.
– Бір мамандық иелерінің отбасын құруы жиі кездесетін жағдай. Мұндай жұптардың ортақ тіл табысуы оңай және бір-бірінің кәсіби қиындықтарын тез түсінеді. Біздің де таныстық студент кезден басталды. Бір топта білім алдық. Қазір отбасын да, қызметті де қатар алып келеміз, – дейді Күлбарам Есенеева.
Сара АДАЙБАЕВА,
«Сыр бойы»
