АҚШ, Канада және Мексикада бес жарым аптаға созылған футбол мерекесі мәресіне жетті. Нью-Джерсиде өткен шешуші кездесуде Аргентинаны қосымша уақытта 1:0 есебімен жеңген Испания құрамасы тарихында екінші рет Әлем чемпионатының алтын жүлдесін иеленді. Жеңіс добын алаңға қосалқы құрамнан шыққан Ферран Торрес соқты.
Кездесудің алғашқы минуттарынан Испания допқа иелік етіп, қарсыласын жоғары қысыммен қыспаққа алуға тырысты. Луис де ла Фуэнте шәкірттері әдеттегідей алаңның әр бөлігінде тығыз әрекет етіп, доптан айырылған бойда оны қайтарып алуға ұмтылды. Алайда Аргентина орталық шепті бекем ұстап, қарсыласының еркін ойнауына мүмкіндік бермеді.
Екінші кезеңде де ойынның сипаты өзгере қоймады. Испания допты бақылап, Аргентина қорғаныстағы тәртібінен жаңылмады. Бірақ негізгі уақыттың аяқталуына санаулы секунд қалғанда Лионель Скалони командасының жоспарына үлкен соққы тиді. 90+3-минутта Энцо Фернандес Пау Кубарсиге қарсы дөрекі ойнағаны үшін екінші сары қағазын алып, алаңнан қуылды.
Негізгі уақыттағы статистика Испанияның басымдығын анық көрсетті. «Қызыл фурия» қарсылас қақпасына 20 рет соққы бағыттап, оның 12-сін нысанаға дәл жеткізді. Ал Аргентина 90 минуттың ішінде бірде-бір соққы жасай алмады. Бұл – Әлем чемпионаты финалистері арасындағы ең төменгі көрсеткіштердің бірі.
Он ойыншымен қалған оңтүстікамерикалықтар кездесуді пенальти сериясына дейін жеткізуге әрекеттенді. Алайда олардың үміті қосымша уақыттың екінші бөлімі басталғаннан кейін небәрі 39 секундтан соң үзілді. 106-минутта Педро Порро допты қақпаның алыс бағанына көтеріп берді. Нико Уильямс әуе добын ұтып, оны басымен кейін қарай бағыттады. Сол сәтте айып алаңында қараусыз қалған Ферран Торрес шамамен сегіз метр жерден допты қақпа маңдайшасының астына дәл қадады.
Аргентина қатарынан екінші Әлем чемпионатының финалына шыққанымен, чемпиондық атағын қорғай алмады. 39 жастағы Лионель Месси бастаған құрама плей-офф кезеңінде бірнеше күрделі сынақтан өтті. Капитанның шеберлігі мен тәжірибесі Аргентинаның тағы бір шешуші матчқа жетуіне үлкен ықпал етті.
Турнир қорытындысында Испания жартылай қорғаушысы Родри Әлем чемпионатының үздік ойыншысы атанып, «Алтын допты» иеленді. Екінші орын Лионель Мессиге, үшінші орын Килиан Мбаппеге бұйырды. Финалдың үздік футболшысы ретінде жеңіс голының авторы Ферран Торрес танылса, Унай Симон «Алтын қолғапты», Пау Кубарси үздік жас ойыншы жүлдесін алды. Франциялық Майкл Олисе жеті нәтижелі паспен турнирдің үздік ассистенті атанып, бір Әлем чемпионатындағы жаңа рекорд орнатты.
Франция жүлдесіз қалғанымен, сегіз кездесуде 10 гол соғып, төрт нәтижелі пас берген Килиан Мбаппе «Алтын бутсаны» жеңіп алды. Ол Әлем чемпионаттарындағы гол санын 22-ге жеткізіп, 21 доп соққан Мессидің рекордын жаңартты. Француз шабуылшысының бір турнирдегі 14 нәтижелі әрекеті де жаңа көрсеткіш саналады. Сегіз гол мен төрт пас тіркеген Месси «Күміс бутсаға» ие болса, Джуд Беллингем мен Эрлинг Холанд жеті голдан соқты.
Англия құрамасы қола жүлдені еншіледі. Томас Тухель шәкірттері жартылай финалда Аргентинадан ұтылғанымен, үшінші орын үшін өткен тартысты кездесуде Францияны 6:4 есебімен жеңді. Бұл – 1966 жылғы чемпиондықтан кейінгі ағылшындардың Әлем чемпионаттарындағы екінші жүлдесі.
2026 жылғы Әлем чемпионаты 11 маусым мен 19 шілде аралығында АҚШ, Канада және Мексикада өтті. Футбол тарихында тұңғыш рет әлемдік доданы бірден үш мемлекет қабылдады.
Бұл – 48 құрама қатысқан алғашқы біріншілік. Командалар 12 топқа бөлініп, турнир аясында жалпы саны 104 кездесу өткізілді. Қатысушылар санының артуына байланысты жарыс бес жарым аптаға созылды.
Жаңартылған формат көптеген елге әлемдік додада бақ сынауға мүмкіндік берді. Кабо-Верде секілді дебютанттардың табысты ойыны, Египеттің тарихи нәтижесі және фавориттердің күтпеген жеңілістері турнирдің тартымдылығын арттыра түсті.
Дегенмен, бес жарым аптаға созылған футбол марафонында ең тұрақты, ұйымшыл әрі тактикалық тұрғыдан сауатты команда Испания болды. Луис де ла Фуэнте шәкірттері топтық кезеңдегі Кабо-Вердемен тең ойыннан кейін біртіндеп қарқын алып, плей-оффтағы барлық қарсыласынан басым түсті.
Нью-Джерсидегі финалда Ферран Торрестің бір ғана дәл соққысы бір жарым айлық доданың басты сұрағына жауап берді. Еуропа чемпиондығын жеңіп алған Испания енді әлемдік футболдың да ең биік шыңына көтерілді.
2026 жылғы Әлем чемпионатының қорытындысы бойынша Испания алтын, Аргентина күміс, Англия қола жүлдеге ие болды. Франция төртінші орынмен шектелді. Ал әлем футболы жаңа чемпионды ғана емес, жаңа рекордтарды, жарқын есімдерді және тарихта ұзақ сақталатын талай драмалық сәтті көрді.
Бағлан АМАНЖОЛ,
«Сыр бойы»
