Волейболдан әйелдер арасындағы 34-ел чемпионатында қызылордалық «Қайсар» клубы сенімді ойын өрнегін көрсетіп, алтын жүлдені жеңіп алды. Сыр өңірінің намысын қорғаған арулар маусым бойы тұрақтылық танытып, шешуші сәтте жарқырай көрінді.
Бес кезеңнен тұрған ел біріншілігінде 12 команда бақ сынады. Тартысты өткен турнирдің төртінші кезеңінде сегіз ұжым плей-офф кезеңіне өтті. Олардың қатарында «Хиуаз» (Атырау), «Жайық» (Орал), «Ертіс» (Павлодар), «Әлия» (Хромтау), «Шымкент», «Тараз», «Астана СДД» және «Қайсар» бар.
Топтық кезеңде қызылордалықтар «Әлия» мен «Ертіске» 1:3 есебімен жол бергенімен, кейін «Астана СДД» мен «Жайықты» айқын басымдықпен жеңіп, жартылай финалға шықты. Бұл кезеңде «Ертіспен» қайта кездескен «Қайсар» қарсыласынан 3:1 есебімен басым түсті. Ал финалда атыраулық «Хиуазбен» өткен тартысты ойында қызылордалық қыздар қайсарлық танытып, 3:2 есебімен жеңіске жетті.
Команданың бұл табысы – жүйелі жұмыстың, табандылықтың және бірліктің нәтижесі. Бас бапкер Дидар Сайын чемпиондыққа жету оңай болмағанын атап өтті.
– Бұл жеңіс кездейсоқ келген жоқ. Біз маусым бойы өте тыңғылықты дайындалдық. Әр жаттығуды жауапкершілікпен өткізіп, қыздар бар күшін салды. Жаттығу процесінде тәртіпке, физикалық дайындыққа және тактикалық ойынға ерекше мән бердік. Қиындықтар да болды, бірақ берілмедік. Жігер керек болды, мінез керек болды. Қыздар соны көрсете білді. Әр ойынға жеке дайындалып, қарсыластарды жіті талдадық. Соның бәрі финалда өз жемісін берді. Команда ішінде бірлік бар. Барлық ойыншы бір мақсат үшін еңбек етті. Біз тек техникалық емес, психологиялық тұрғыдан да дайын болуға тырыстық. Финалдағы шешуші ойында қыздардың сабыр сақтап, соңына дейін күрескені – еңбектің нәтижесі. Алдағы уақытта да осы қарқынды жоғалтпай, одан әрі дами түсеміз. Бұл – тек бастамасы, – деді ол.
Чемпиондықпен бірге «Қайсар» қыздары жеке марапаттан да құр қалмады. Үздік байланыстырушы атанған Мөлдір Нұрлан ойынды шебер құрап, әр пасымен көзге түсті, үздік диагоналшы Әдемі Қияшева шабуылда жарқырап, қарсылас қорғанысын бұзды, ал Жанел Қоңырова алаңда алғырлығымен танылып, жеңіске жол ашты.
Айта кетейік, «Қайсар» волейбол клубы 2023 жылы құрылған. Алғашқы маусымында команда 12 ұжымның ішінде бесінші орынға ие болды. Келесі жылы сегіз команданың арасында төртінші орынға тұрақтап, тәжірибе жинақтады. Ал биылғы маусымда сол еңбектің жемісін көріп, ел чемпионы атанды.
Бағлан АМАНЖОЛ,
«Сыр бойы»
