Облыс әкімі Қырымбек Көшербаев брифинг барысында БАҚөкілдерінің сауалдарына жауап берді.
Лаура Амантаева, «Қазақпарат»
тілшісі:
– «Рухани жаңғыру» бағдарламасының басты бағыттарының бірі – қазақ тілін латын графикасына көшіру. Осы бастама туралы ойыңызды білсек… Екінші сауалым, Қызылорда қаласында ашылатын физика-математика мектебінде академик Асқар Жұмаділдаев дәріс бере ме?
Жауап:
– Латын әліпбиіне көшу – жаңа заманның талабы. Біріншіден, біздің ұлт тілінің сақталып қалуына септігін тигізеді. Бұл жайында мамандар жан-жақты сарапталған пікірлерін білдіруде. Екіншіден, әлемдік өркениеттен орнымызды алу үшін өте қажет. Дүниежүзінің көптеген елдері латын әліпбиін пайдаланады. Сондықтан бұл үрдіске біздің де ілесуіміз, оған қоса, қазақ, орыс, ағылшын тілдерін меңгеру ұрпағымыздың болашағы үшін керек. Оқу процесінде, балаларға білім беру саласына қатысты түрлі қоғамдық дискуссия жүріп жатыр. Әрине, бірінші кезекте ана тілін үйрету керек. Осыған байланысты Ахмет Байтұрсынұлының еңбектерінде көп мәселе айтылған. Негізінде латын әліпбиіне көшу және тілдерді меңгеру ұлтымыздың жоғары мүддесі үшін аса қажет.
Екінші сауалыңызға келсек, Қызылордадан физика-математика мектебін ашу туралы шешімді Асқар Жұмаділдаевпен ақылдаса отырып қабылдадық. Өткен жылдың соңында жерлесімізге «Қызылорда облысының Құрметті азаматы» деген атақ берілді. Академик жаңа заманның шақыруларына сәйкес кадрлар дайындау мәселесі көтерілгенде өз ойын білдірген болатын. Сондықтан А.Жұмаділдаевті бұл жобаның авторларының бірі деп есептеуге болады. Шет елдерде, Еуропаның, АҚШ-тың, Германияның университеттерінде дәріс оқып жүрген ғалым өз туған жерінде шәкірттерге дәріс оқып, қолдау жасайды деп ойлаймын. Академик Жұмаділдаев МГУ-дың 4-курсында оқып жүріп, төрт ғасыр бойы дүниежүзі математиктері шеше алмаған теорияны тапқан, дипломдық жұмысын кандидаттық диссертация деңгейіне жеткізген.
>>> Біздің Facebook, Instagram парақшаларымыз бен Telegram каналымызға жазылыңыз! <<<
