2026 жылы Қызылорда облысында медициналық оңалту қызметтерін қаржыландыруға 4,1 млрд теңге қарастырылды. Бұл көрсеткіш 2022 жылмен салыстырғанда бір жарым еседен астам өсіп отыр. Бұл туралы Әлеуметтік медициналық сақтандыру қорының Қызылорда облысы бойынша филиалы хабарлады.
Филиал директоры Жақсылық Абдусаметовтің айтуынша, міндетті әлеуметтік медициналық сақтандыру (МӘМС) жүйесінің арқасында өңір тұрғындарына көрсетілетін оңалту қызметтерінің қолжетімділігі артып келеді.
2026 жылдың алғашқы төрт айында облыстың күндізгі және тәулік бойы жұмыс істейтін стационарларында 3 912 пациент медициналық оңалтудан өтті. Сонымен қатар амбулаториялық деңгейде 13 789-ға жуық оңалту қызметі көрсетілген. Осы кезеңде медициналық оңалту қызметтерін қаржыландыруға 1,2 млрд теңге бағытталды.
Медициналық оңалтудың маңызы
Медициналық оңалту – ауыр аурулардан, жарақаттардан немесе хирургиялық операциялардан кейін адамның жоғалған функцияларын қалпына келтіруге бағытталған кешенді медициналық көмек. Ол пациенттің күнделікті өмірге және еңбек қызметіне тезірек оралуына мүмкіндік береді.
Көпшілік арасында оңалту қызметтері қымбат деген пікір қалыптасқан. Алайда медициналық көрсетілімдер болған жағдайда бұл қызметтер МӘМС жүйесі аясында тегін көрсетіледі.
Оңалту көмегін кімдер ала алады?
Медициналық оңалту:
- негізгі немесе созылмалы ауруларды емдеу кезінде;
- жедел жағдайлардан кейін;
- хирургиялық операциялардан кейін;
- жарақаттардан кейін;
- өмір сүру белсенділігін шектейтін жағдайларда тағайындалады.
Оңалтудан өту үшін не істеу керек?
Оңалту қызметін алу үшін азамат алдымен тіркелген емханасына жүгінеді. Емдеуші дәрігер пациентті реабилитологқа немесе мультидисциплинарлық топ мамандарына жолдайды. Мамандар кешенді бағалау жүргізіп, оңалту бағдарламасын әзірлейді.
Қажеттілігі расталған жағдайда пациент амбулаториялық, стационарлық, үй жағдайында немесе санаторий-курорттық ұйымдарда оңалтудан өте алады.
Өңірде 33 медициналық ұйым қызмет көрсетеді
Биыл Қордың облыстық филиалы медициналық оңалту қызметтерін көрсететін 33 медициналық ұйыммен келісімшарт жасасқан. Оның ішінде:
- 18 мемлекеттік ұйым;
- 14 жеке ұйым;
- 1 квазимемлекеттік ұйым бар.
Жалпы қаржыландырудың 3,5 млрд теңгесі тәулік бойы және күндізгі стационарларда көрсетілетін оңалту қызметтеріне бағытталған.
Қайда жүгінуге болады?
Медициналық көмекке қатысты сұрақтар туындаған жағдайда азаматтар өз емханаларындағы Пациенттерді қолдау қызметіне жүгіне алады. Сондай-ақ Әлеуметтік медициналық сақтандыру қорына Qoldau 24/7 мобильді қосымшасы, ресми сайт, Telegram-бот және 1414 байланыс орталығы арқылы өтініш беру мүмкіндігі қарастырылған.
Медициналық оңалту – денсаулықты қалпына келтірудің маңызды кезеңі. Сондықтан қажетті медициналық көрсетілімдер болған жағдайда тұрғындар МӘМС аясындағы бұл мүмкіндікті тиімді пайдалана алады.
