Әлем елдерін әлекке салған «COVID-19» вирусы біздің мемлекетіміз үшін де қауіп тудыруда. Қатерлі індет облыс көлемінде ең алғаш 28 наурызда тіркелген болатын. Алғашқы кезде тұрғындар аурудың бар екеніне сенбей, сақтық шараларына мән бермегенін білеміз.
Алайда қауіпті кесел өз дегенін істеді. Бірлі-жарым болса да үздіксіз тіркелген ауру маусым, шілде айларында тіпті өршігені есімізде. Республика көлемінде ахуал күрделенді. Осыған байланысты қатаң карантиндік режим енгізіліп, шектеу шаралары қабылданды. Тамыз айында ауру едәуір бәсеңдегенімен, қауіп сейілген жоқ еді. Дүниежүзілік денсаулық сақтау ұйымы күзде пандемияның екінші толқыны болады деген болжам айтты. Қазірдің өзінде тұрғындар пандемия жайлы өткен шақта айтып жүр. Бірақ індет қайта белең алуда. Еуропа елдерінде, көрші Ресейде коронавирус инфекциясын жұқтырғандар саны күн сайын артып отыр.
Біздің еліміздің солтүстік аймақтарында да эпидахуал тұрақсыздануда. Сондықтан сақтық шараларын қатаң ұстанып, өз денсаулығымызға өзіміз жауапкершілікпен қарауымыз керек. Облыста бүгінде індет жұқтырғандар саны 3249-ды құрайды. Оның 55,4 процентінде клиникалық белгілері бар болса, 44,6 процентінің клиникалық белгілері айқындалмаған. Ауруға шалдыққандардың басым көпшілігі – 20-29, 70-79 жас аралығындағы азаматтар. Бұл дегеніміз, карантиндік шектеулерге қарамастан, жастардың ойын-сауық басқосуларының жалғасып, үлкен кісілердің ас беру, үй жағдайында той, жиындарға баруының тыйылмағанын көрсетеді. Осындай жиындарды болдырмау, алдын алу мақсатында облыста құрылған мониторингтік топ бүгінге дейін 3000-ға жуық тексеру ұйымдастырып, 629 азаматқа әкімшілік құқық бұзушылық туралы хаттама толтырылды.
Мәселен, төтенше жағдай жарияланған 16 наурыз – 11 мамыр аралығында 229 ауру тіркелсе, төтенше жағдай алынғаннан кейін, яғни, 12 мамыр – 5 шілде аралығында ауруға шалдыққандар саны 1179-ға дейін өсті. Бұл – эпидемиологиялық ахуал тұрғындардың іс-қимылымен тікелей байланысты екенінің тағы бір дәлелі. «Сақтансаң сақтаймын» демекші, ендеше пандемияның болжамды екінші толқынын болдырмау өзімізге байланысты екенін ескеруіміз қажет. Осы орайда саулығымызға салғырт қарамай, сақтық шараларын қатаң орындауға шақырамын.
Әлия ЫДЫРЫСОВА,
облыстық тауарлар мен көрсетілетін қызметтің сапасы мен қауіпсіздігін бақылау департаментінің бөлім
басшысы
>>> Біздің Facebook, Instagram парақшаларымыз бен Telegram каналымызға жазылыңыз! <<<
