Биыл 6 айда өңірімізде әлеуметтік маңызы бар азық-түлік тауарлары бағасының орташа индексі 101,3 пайыз болды. Бұл республикалық көрсеткіштен (101,9 пайыз) 0,6 пайызға төмен.
Бағаның негізсіз өсуіне жол бермеу және сауда заңнамасының сақталуын қамтамасыз ету ҚР Сауда және интеграция министрлігі Қызылорда облысы бойынша сауда және тұтынушылардың құқықтарын қорғау департаментінің басты назарында. Департамент қызметкерлері есепті кезеңде 98 кәсіпкерлік субъектісін тексерген болатын.
– Әлеуметтік маңызы бар азық-түлік тауарлары үшін заңнамада белгіленген 15 пайыздық сауда үстемесінің сақталмау фактілері анықталып, кінәлі тұлғалар әкімшілік жауапкершілікке тартылды. Бұдан бөлек, тауар бағасын заңнама талабына сәйкес рәсімдемеген 42 кәсіпкерлік субъектісіне 544 мың теңге көлемінде әкімшілік айыппұл салынды. Сауда инфрақұрылымын дамыту бағытында облыс орталығындағы «Сыбаға», «Асбол» және «Талғат» базарларында жаңа сауда үйлерінің құрылысы жүріп жатыр. Аталған жобалардың іске асырылуы тұрақты бақылауымызда, – деді департамент басшысының орынбасары Әділхан Төлегенов.
Жыл басынан бері тұтынушылар құқығының бұзылуына қатысты 597 өтініш түскен. Бұл өткен жылдың сәйкес кезеңімен салыстырғанда 37 пайызға артық. Оның басым бөлігі бөлшек және электронды сауда, қоғамдық тамақтану және тұрғын үй-коммуналдық шаруашылық қызметтері салаларына қатысты.
– Қабылданған іс-шаралар нәтижесінде тұтынушыларға 10 млн теңгеге жуық қаражаттың қайтарылуына ықпал жасадық. 48 кәсіпкерлік субъектісі тексеріліп, 588 мың теңге көлемінде әкімшілік айыппұл салынды. Тұтынушылардың құқықтық сауаттылығын арттыру мақсатында тұрақты түрде семинар, дөңгелек үстел, ашық есік күні, кеңес беру және ақпараттық акция үлгісінде іс-шаралар ұйымдастырып тұрамыз. Құқығы бұзылған азаматтарға қолданыстағы заңнама аясында тегін құқықтық кеңес береміз. Талап қою құжатын дайындауға және сотқа жүгіну мәселелері бойынша жан-жақты көмек көрсетеміз, – деді Әділхан Төлегенов.
Назерке САНИЯЗОВА,
«Сыр бойы».
